ۋكراينا تۇركياعا بوسفور بۇعازىنان رەسەي كەمەلەرىن وتكىزبەۋ تۋرالى ۇسىنىس ءبىلدىردى

ۋكراينا كەرچتەگى تەكەتىرەستەن سوڭ تۇركياعا بوسفور بۇعازىنان رەسەي اسكەري كەمەلەرىن وتكىزبەۋ تۋرالى ۇسىنىس ءبىلدىردى.

وسىعان دەيىن رەسەيدىڭ قارا تەڭىز فلوتىنىڭ كەمەلەرى سۇرياداعى اسكەري وپەراتسياعا قاتىسۋ ءۇشىن بۇعازدان بىرنەشە رەت وتكەن. ۋكراينانىڭ اسكەري-تەڭىز كۇشتەرىنىڭ قولباسشىسى يگور ۆورونچەنكو بۇگىن تۇركيا بيلىگىنە الداعى ۋاقىتتا رەسەيلىك كەمەلەردى بۇعازدان وتكىزبەۋ تۋرالى ۇسىنىس ايتتى. ازىرشە، تۇركيا بيلىگى ۋكريانانىڭ ۇسىنىسىنا قاتىستى جاۋاپ بەرگەن جوق ال ۋكراينا پرەزيدەنتى پەتر پوروشەنكو باسىلىمداردىڭ بىرىنە بەرگەن سۇحباتىندا، ناتو-نى ازوۆ تەڭىزىنە كەمەلەرىن جىبەرىپ، ورتاق اسكەري جاتتىعۋ جۇمىستارىن وتكىزۋگە شاقىراتىنىن مالىمدەدى. ونىڭ پىكىرىنشە، رەسەي 2014 جىلى قىرىمدى اننەكسيالاپ، دونباسستى باسىپ العان سوڭ، ۋكراينانىڭ تاعى ءبىر بولىگىن تارتىپ الۋعا نيەتتى. بۇعان دەيىن تۇركيا پرەزيدەنتى رەجەپ تايىپ ەردوعان: «ۋكراينا مەن رەسەي اراسىنداعى ماسەلەنى ديپلوماتيالىق جولمەن شەشۋ كەرەك» دەپ مالىمدەگەن بولاتىن. سونداي-اق ەردوعان كەرچ بۇعازىنداعى جاعدايدى ارگەنتينادا وتەتىن «ۇلكەن جيىرمالىق» (G20) ەلدەرىنىڭ سامميتىندە تالقىلايتىنىن ايتتى.

ايتا كەتەيىك، جەرورتا مەن قارا تەڭىز اراسىن قوساتىن بوسفور بۇعازىنىڭ قۇقىقتىق مارتەبەسىن رەتتەيتىن «مونترە» كونۆەنتسياسىنا ساي، قارا تەڭىز جاعاسىنداعى ەلدەردىڭ اسكەري كەمەلەرى بۇعازدان وتۋگە قۇقىلى. سونىمەن قاتار، تۇركيا وزىنە قارسى، ءارى سوعىس ۇيىمداستىرۋشى مەملەكەتتەردىڭ كەمەلەرىن وتكىزبەي قويۋعا حاقى بار.

"The Qazaq Times"