قىرعىز پارلامەنتى اتامباەۆتىڭ كىرىسىن تەكسەرۋدى تالاپ ەتۋدە

جوعارى كەڭەس دەپۋتاتى يسا ومۋركۋلوۆ ەكس-پرەزيدەنت المازبەك اتامباەۆتىڭ تابىسى قايدان كەلىپ جاتقانىن تەكسەرۋ كەرەك دەپ مالىمدەدى.

«مەن اتامباەۆتىڭ قانشا بايلىعى بار ەكەنىن بىلمەيمىن. ءاربىر شەنەۋنىك زاڭعا سايكەس، دەكلاراتسيا تولتىرىپ، بارلىق تابىسى مەن مۇلكىن اشىق كورسەتۋى كەرەك. ەگەر ول ادام دۇرىس انىقتاما بەرمەسە، جاۋاپقا تارتىلۋى ءتيىس. ونىڭ كىمدەر ارقىلى قوسىمشا تابىس تاۋىپ وتىرعانىن دا انىقتاۋ قاجەت. ەگەر ول كاسىبىنەن تابىس تاپسا، ءونىمىنىڭ كولەمى، كىرىسى، شىعىسى جونىندە تولىق مالىمەت بەرۋى ءتيىس. ءاربىر ادام، ونىڭ ىشىندە اتامباەۆ تا كىرىسىن اشىق كورسەتپەگەنى ءۇشىن، جاۋاپكەرشىلىككە تارتىلۋى كەرەك", - دەپ ەسەپتەيدى ومۋركۋلوۆ.

دەپۋتاتتىڭ پىكىرىنشە، اڭگىمە ميلليون سوم ەمەس، ميلليونداعان دوللار جايىندا بولىپ تۇر. "مۇنداي اقشانى قىسقا مەرزىمدە تابۋعا بولا ما؟ كۇماندى، سول سەبەپتەن تەكسەرۋ كەرەك", - دەيدى ومۋركۋلوۆ.

قىرعىزستاننىڭ ەكس-پرەزيدەنتى المازبەك اتامباەۆ مەملەكەت باسشىسى بولعانعا دەيىن جەكە كاسىبىنەن ميلليونداعان پايدا تاپقانىن مالىمدەپ كەلگەن. "اپرەل" تەلەكانالىنا بەرگەن سۇحباتىندا تابىسىنىڭ كوزدەرىن دە ايتقان.

23 قاراشادا باس پروكۋراتۋرا ۇلتتىق قاۋىپسىزدىك مەملەكەتتىك كوميتەتكە قوعام قايراتكەرى ەديل بايسالوۆتى تەرگەگەننەن كەيىن، اتامباەۆتىڭ تۇركياداعى بيزنەسىن ساتۋىنان تۇسكەن تابىستى تەكسەرۋگە بۇيرىق بەرگەن.

"The Qazaq Times"