اقش مەملەكەتتىك دەپارتامەنتىنىڭ رەسمي وكىلى حيزەر نويەرت. فوتو: usembassy.gov

ەۋروپا ەلدەرى كەرچ بۇعازىنداعى وقيعاعا بايلانىستى رەسەيگە قارسى سانكتسيالاردى كۇشەيتۋى قاجەت. بۇل تۋرالى اقش مەملەكەتتىك دەپارتامەنتىنىڭ رەسمي وكىلى حيزەر نويەرت حابارلادى.

بۇعان دەيىن ەۋروپا 2014 جىلى رەسەيدىڭ قىرىمدى اننەكسيالاپ الۋىنا قارسى بىرنەشە سانكتسيالار ەنگىزگەن بولاتىن. حيزەر نويەرت ءوز مالىمدەمەسىندە: «اقش ۋكراينانى قولدايدى. ءبىز باسقا ەلدەردىڭ دە وسى ساياساتتى ۇستانعانىن قالايمىز. ۇلتتىق قاۋىپسىزدىك ستراتەگيامىزدا كورسەتىلگەندەي، الەم ەلدەرىنىڭ ءبىر-بىرىنە قولداۋ ءبىلدىرۋى مىندەت. وسى رەتتە ەۋروپا ەلدەرىن «سولتۇستىك اعىن – 2» قۇبىرى جوباسىنان باس  تارتۋعا شاقىرامىز. سەبەبى، بۇل جوبا رەسەي مۇددەسى مەن ەكونوميكاسىنا كومەكتەسەدى»، – دەدى.

ەۋروپا وداعىنىڭ ۋاقىتشا توراعا قىزمەتىن اتقارۋشى، اۋستريا سىرتقى ىستەر ءمينيسترى كارين كنايسل جەلتوقساندا وتەتىن سامميتتە وداق ەلدەرىنىڭ باسشىلارى ازوۆتا ۋكراينانىڭ ءۇش اسكەري كەمەسىن ەكيپاجىمەن قوسا باسىپ العانى ءۇشىن رەسەيگە سالىنعان سانكتسيالاردى قاتاڭداتۋ ماسەلەسىن قاراستىراتىنىن مالىمدەدى. بۇل ۇسىنىسقا ەستونيا، پولشا قولداۋ بىلدىرسە، گەرمانيا مەن فرانتسيا قارسى شىقتى. ەكى ەل وكىلدەرى ۋكراينا مەن رەسەي اراسىنداعى دوستىق قاتىناسىن كۇشەيتۋ كەرەكتىگىن جانە سانكتسيانىڭ بۇعان ساي كەلمەيتىنىن ايتقان.

وسى اپتادا كيەۆ پەن ماسكەۋ تەكەتىرەسى بۇۇ-نىڭ قاۋىپسىزدىك كەڭەسىندە تالقىلانىپ، اقش، ناتو جانە ەو تولىعىمەن ۋكراينانىڭ اۋماقتىق ەركىندىگىن قولدادى. سونىمەن قاتار، ەۋروپالىق وداق ەلدەرى رەسەيدىڭ بۇل ارەكەتىن «كەزەكتى اگرەسسورلىق پيعىلعا» بالادى. ال اق ءۇي باسشىسى دونالد ترامپ ارگەنتينادا وتەتىن سامميت بارىسىندا پۋتينمەن كەزدەسپەۋىم مۇمكىن، سەبەبى رەسەي جاساپ وتىرعان اگرەسسيا ۇنامايدى دەپ مالىمدەدى.
ايتا كەتەيىك، 25 قاراشا رەسەي كەرچ بۇعازىندا ۋكراينا اسكەري-تەڭىز كۇشتەرىنىڭ ءۇش كەمەسىن باسىپ الىپ، وق اتقان. ۋكراينا پرەزيدەنتى پەتر پوروشەنكو رەسەيدىڭ بۇل ارەكەتىن «باسقىنشىلىق» دەپ اتاپ، ولاردان ازوۆ تەڭىزىندە ۇستالعان ۋكراينا اسكەري كەمەلەرى مەن تەڭىزشىلەرىن دەرەۋ بوساتۋدى تالاپ ەتتى.

"The Qazaq Times"