شىمكەنت اكىمى جاڭا جىلدى قارسى الۋعا 70 ميلليون تەڭگە جۇمساماق

شىمكەنت اكىمى جاڭا جىلدى قارسى الۋعا 70 ميلليون تەڭگە جۇمساماق.

جاقىندا عانا قازاقستانداعى ءۇشىنشى مەگاپوليس اتانىپ، رەسپۋبليكالىق ماڭىزعا يە قالالاردىڭ قاتارىنا قوسىلعان شىمكەنت قالاسىنىڭ اكىمى عابيدوللا ءابدىراحىموۆ جاڭا جىلدى قارسى الۋعا 70 ميلليون تەڭگە قارجى جۇمسايتىندىعىن مالىمدەدى.

«بۇل ەلدەر ايتىپ جۇرگەندەي ۇلكەن سوما دەپ ويلامايمىن. قالامىزدىڭ ادەمى ءارى تارتىمدى بولعانىن بارلىعىمىز قالايمىز. جاقىندا مەن سەۋلدا بولدىم. سىزدەر تۇنگى مەگاپوليستىڭ جارقىراپ، جايناپ تۇرعانىن كورسەڭىزدەر عوي. ول جاقتا بۇعان 70 ميلليون تەڭگە ەمەس، 70 ميلليون دوللار بولگەن ءتارىزدى. ايەلدەر نەگە ادەمى بولىپ جۇرەدى؟ ءبىز نەگە مەرەكەلىك كيىمدەر كيەمىز؟ سول سياقتى مەرەكەلىك قالا دا جايناپ تۇرۋى ءتيىس. ادام «ۆاۋ» دەپ ايتاتىنداي ءومىر ءسۇرۋى ءتيىس» -دەدى شىمكەنت قالاسىنىڭ اكىمى ءباسپاسوز بريفينگىندە.

ايتا كەتەتىن ءبىر جايت، بىلتىر ءدال وسى عابيدوللا ءابدىراحىموۆ جاڭا جىلدى قارسى الۋعا بولىنگەن قارجىنى جەتىم بالالارعا سىيلىق الۋعا جۇمساپ كوپشىلىكتىڭ ىقىلاسىنا بولەنگەن. جالپى، ءابدىراحىموۆ حالىق اراسىندا ءوزىنىڭ جاڭاشىل باستامالارىمەن تانىمال. وسىدان ءبىراز ۋاقىت بۇرىن ول قوعامدىق كولىكپەن ءجۇرىپ ەلدىڭ نازارىن وزىنە اۋدارتقان. ال ودان ءسال ەرتەرەكتە جۇمىسقا ۆەلوسيپەدپەن بارىپ الەۋمەتتىك جەلىلەردىڭ «گۇلى» بولعان.

"The Qazaq Times"