فوتو: 4td.fm

امەريكاندىق SpaceX كومپانياسىنىڭ باسشىسى يلون ماسك امەريكانىڭ "Axios" باسىلىمىنا بەرگەن سۇحباتىندا ءوزىنىڭ مارسقا بارۋ ىقتيمالدىعى  70 پايىز ەكەندىگىن ايتتى.

«ءبىز جاقىندا تەحنولوگيا سالاسىندا  بىرنەشە جاڭالىقتار اشتىق، ناتيجەسىندە مەن سودان قۋات الىپ، جىگەرلەندىم»، - دەدى ول.  ونىڭ ايتۋىنشا، مارسقا ۇشۋ بيلەتىنىڭ باعاسى شامامەن ەكى ءجۇز مىڭ دوللار بولادى.

سونداي-اق، كومپانيا باسشىسى باي ادامداردىڭ مۇنداي ساپارعا شىعۋعا تاۋەكەلگە بارا بەرمەيتىنىن اتاپ ءوتتى. ويتكەنى، "مارستا ءولۋ ىقتيمالدىعى جەرگە قاراعاندا الدەقايدا جوعارى" دەدى ول.

وتكەن جىلدىڭ قىركۇيەك ايىندا يلون  ماسك SpaceX كومپانياسى مارسقا ۇشاتىن ارنايى زىمىراننىڭ جانە دە جەردىڭ ءبىر نۇكتەسىنەن ەكىنشىسىنە ءبىر ساعاتتان دا از ۋاقىتتا جەتەتىن زىمىران دايىندالىپ جاتقاندىعىن ايتقان بولاتىن. ونىڭ اتاۋى - BFR. ماسكتىڭ ايتۋىنشا، ولار  كومپانيانىڭ بارلىق جەتىستىكتەرىن BFR زىمىرانىن جاساۋ ءۇشىن پايدالانۋدا.

الدىن الا بولجام بويىنشا، اتالمىش زىمىران مارس پەن ايعا ۇشۋى مۇمكىن. زىمىران الدىمەن جاقىن جەردەگى وربيتاعا جەتىپ، جانارماي قۇيۋ جۇمىستارىن جۇرگىزەدى. سودان سوڭ، ءتيىستى جەرىنە دەيىن توقتاماي ۇشادى. اتاپ ايتقاندا، اتالعان تەحنولوگيا جەر سەرىگىندە ارنايى بازا قۇرۋ ءۇشىن جەردەن ايعا جانە كەرى قاراي ۇشۋى ءتيىس.

ايتا كەتەيىك، العاش رەت 2016 جىلى SpaceX كومپانياسى 2020-2025 جىلدارعا قاراي مارسقا ۇشۋ جوسپاردا بار ەكەنىن ايتقان بولاتىن.

"The Qazaq Times"