قىتاي باسشىسىنىڭ پاناما ساپارى – ورتالىق امەريكا ءۇشىن تالاس

پاناما پرەزيدەنتى بەيسەنبى كۇنى ءوز سارايىندا ءباسپاسوز مالىمدەمەسىن جاساپ، قىتاي توراعاسى شي جينپيڭ جەلتوقساننىڭ باس شەنىندە پاناماعا ساپارلاي كەلەتىنىن، تاراپتار ەكىجاقتى قاتىناستاردى نىعايتا تۇسەتىنىن جەتكىزدى. پاناما بىلتىر تايۋانمەن (تايۆان) بولعان ديپلوماتيالىق بايلانىستارىن قىسقارتىپ، رەسمي بەيجىڭدى مويىندايتىنىن جاريالاعان جانە وسى شەشىمى بويىنشا امەريكا قۇراما شتاتتارىنىڭ سىنىنا ۇشىراعان ەدى.

قۇراما شتات قىتايدىڭ ورتالىق امەريكاداعى ىقپالىنىڭ ارتىپ كەلە جاتقانىنان قاتتى الاڭدايدى. پانامادان كەيىن دومينكا مەن ەل-سالۆادور دا تايۋانمەن بايلانىستى قىسقارتىپ، رەسمي بەيجىڭدى تاڭداعاننان كەيىن، اقش ءۇش ەلدىڭ دە ەلشىلەرىن ەلىنەن شىعارىپ جىبەردى.

كەڭەس وداعى مەن امەريكا قۇراما شتاتتارى اراسىندا ورتالىق امەريكاعا ىقپال ەتۋگە باسكەلەسكەن «قىرعيقاباق سوعىس» كەزىنەن بەرى قاراي بۇل ايماق تاعى دا ۇلكەن دەرجاۆالاردىڭ «اگەنتتەر شايقاسى» الاڭىنا اينالدى.

پاناما پرەزيدەنتىنىڭ مالىمدەمەسىنە قاراعاندا، قحر توراعاسى شي جينپيڭ 2-3 جەلتوقسان كۇندەرى پاناما ەلىنە «قايتالانباس ساپار» جاسايدى. پرەزيدەنت حۋان كارلوس ۆارەلا قىتاي باسشىسىمەن ىسكەرلىك، تەحنولوگيالىق جانە ينفراقۇرىلىم سالاسىنداعى ىنتىماقتاستىقتى قامتىعان 20-عا جۋىق كەلىسىمگە قول قوياتىنىن باسا ايتىپ وتكەن.

بيىل شىلدەدە، پاناما مەن قىتاي اراسىندا ەركىن ساۋدا تۋرالى كەلىسىمدەر جۇرگىزىلە باستادى. بۇعان قاراپ، پاناما قىتاي تاۋارلارىن ورتالىق امەريكاعا تاراتاتىن ورتالىققا اينالۋى مۇمكىن دەپ بولجاۋعا بولادى. ال، قىتاي باسشىسىنىڭ رەسمي ساپارلار كەستەسىندە ءبىر عانا پاناما تۇرعان جوق. ارگەنتيناداعى G20 ءسامميتىنىڭ الدىندا شي جينپيڭ يسپانيا مەن پورتۋگالياعا ساپار شەگەدى.

بۇل قادامدار  G20 ءسامميتىنىڭ اياسىندا اقش پرەزيدەنتى ترامپپەن بولاتىن كەزدەسۋگە ءوز اسەرىن تيگىزۋى مۇمكىن. قىتاي بۇل جولى اقش-پەن ساۋدا كەلىسىمىنە كەلۋگە باستى ۇمىتتەنۋشى تاراپ بولىپ وتىر.

“The Qazaq Times”