ەۋروپا ەلدەرى ورتاق ارميا قۇرۋ قادامىن جيىلەتە ءتۇستى

ەۋروپا وداعى سىرتقى ىستەر جانە قاۋىپسىزدىك جونىندەگى ارنايى وكىلى فەدەريكا موگەريني فرانتسيا پرەزيدەنتى ورتاعا سالعان «ەۋروپا ارمياسىن» قۇرۋ ءىسىن قولعا الىپ جاتقاندارىن مالىمدەدى.

ەو-عا مۇشە ەلدەردىڭ قورعانىس مينيسترلەرى بەلگيانىڭ ورتالىق قالاسى بريۋسسەلدە باس قوستى. قورعانىس وكىلدەرى مەن سىرتقى ىستەر مينيسترلىكتەرىنىڭ كەڭەسىنەن كەيىن جاسالعان مالىمدەمەدە «ەۋروپا ارمياسىن» قۇرۋ ىستەرى قولعا الىنعانى بەلگىلى بولدى.

موگەرينيدىڭ ايتۋىنشا، ەۋروپا ەلدەرىنىڭ قورعانىس سالاسىنداعى تالپىنىستارى ناتو وڭىردەگى اتقارعان جۇمىستارىمەن ۇيلەستىرۋ باستى ماقسات ەتىلگەن. سەبەبى، ەۋروپا ارمياسى قۇرىلىپ، ول ەو-عا مۇشە ەلدەردىڭ قاۋىپسىزدىگىن تولىق قامتاماسىز ەتە العانعا دەيىن، اتالعان وداق ناتو-نىڭ قورعاۋىنان قول ۇزە المايدى.

وسىدان بۇرىن ناتو  باس حاتشىسى ستولتەنبەرگ «ەۋروپالىق ارميا» ناتو-عا بالاما كۇش بولا المايتىنىن ايتقان. ياعني، ول ەۋروپا قاۋىپسىزدىگى ۇزاق ۋاقىتقا دەيىن ناتو-دان قول ۇزە المايدى. ەو تارابى «ەۋروپالىق ارميا» قۇرۋ ناتو-نىڭ بۇنداعى اتقارعان جەمىستى قىزمەتىن ءتىپتى دە تولىقتىرا تۇسەدى دەگەندى العا تارتۋدا.

«ءبىز ەۋروپا ارمياسىن قۇرۋعا تالپىنىپ وتىرمىز. الايدا، بۇل جەردە ەشكىم بۇل تۋرالى ءسوز قوزعاماي وتىر. مۇشە ەلدەردىڭ وڭىردە جانە الەمدەگى قاۋىپسىزدىكتى ساقتاۋدا ءتىپتى دە كوپ مۇمكىندىكتەرگە جەتۋى ءۇشىن ينۆەستيتسيا سالۋىمىز كەرەك»، – دەدى فەدەريكا موگەريني.

“The Qazaq Times”