حاشوگگي ءىسى: حانزادا سالمان بيلىكتەن كەتۋى مۇمكىن

جۋرناليست جامال حاشوگگيدىڭ ولىمىنەن سوڭ، ساۋد ارابياسىندا كورول وتباسى حانزادا مۇحاممەد سالماننىڭ تاق مۇراگەرى بولعانىن قالامايتىنىن ايتتى.

ءجۋرناليستىڭ «جانتۇرشىگەرلىك ولىمىنەن» كەيىن حانزادا مۇحاممەد سالماننىڭ رەيتينگىسى بۇرىنعىدان تومەندەپ كەتكەن. بۇدان بولەك، 2017 جىلى مۇحاممەد بين سالمان سىبايلاس جەمقورلىق جاسادى دەگەن ايىپپەن ونداعان حانزادا مەن كاسىپكەرلەردى تۇتقىنداعاننان سوڭ رەفورماتورلىق اتاعىنا قايتا سىزات ءتۇستى. ولاردىڭ باسىم بولىگى راسىمەن استىرتىن ارەكەتتەرگە بارسا دا، جەرگىلىكتى تۇرعىندار «حانزادا وسى ارەكەتى ارقىلى ساياسي جانە ىسكەرلىك باعىتتاعى باسەكەلەستەرىنەن قۇتىلۋدى كوزدەيدى»، – دەپ ەسەپتەدى. ال وسى تاقىرىپ تۋرالى ءىز-ءتۇسسىز جوعالعان جۋرناليست جامال حاشوگگي ءوز ماقالالارىندا ءجيى سىناپ جازعان.

25 قازاندا اقش پرەزيدەنتى دونالد ترامپ ساۋد ارابياسى بيلىگىن قاتاڭ سىنعا الىپ، جۋرناليست جامال حاشوگگيدىڭ ولىمىنە قاتىسى بار دەگەن ساۋديالىق شەنەۋنىكتەرگە سانكتسيالار ەنگىزدى. ەندى ولارعا «ماگنيتتىك جاھاندىق اكت» جوباسى بويىنشا قۇراما شتاتتارىنا كىرۋگە تىيىم سالىنادى. دونالد ترامپ ءوز سوزىندە: «حاشوگگيدىڭ ءولىمى ساۋد ارابياسىنىڭ بەدەلىنە نۇقسان كەلتىردى. ساۋد ارابياسىنىڭ حانزاداسىمەن حابارلاسقانىمدا، ول بۇل ىسكە ەش قاتىسى جوق ەكەنىن ايتتى. دەمەك، وعان باسقا ادامدار جاۋاپتى. تەرگەۋ ءىسى ءالى دە جالعاسىپ جاتىر. مىندەتتى تۇردە ءتيىستى شارا قولدانىلادى. كوپ ۇزاماي ناقتى اقپاراتقا كول جەتكىزەمىز» – دەدى. الايدا، شەتەلدىك باسىلىمداردىڭ باسىم بولىگى وپپوزيتسيالىق ءجۋرناليستى ولتىرۋگە حانزادانىڭ قاتىسى بار ەكەندىگىن جازدى.

ايتا كەتەيىك، جامال حاشوگگي 2 قازاندا ىستامبۇلداعى ساۋد ارابيا كونسۋلدىعىندا ءىزىم-عايىم جوعالىپ كەتكەن. بىرنەشە كۇننەن سوڭ مارقۇمنىڭ دەنە بولشەكتەرى قالا ماڭىنان تابىلدى. وتكەن اپتادا ساۋد ارابياسى حاشوگگيدى كونسۋلدىقتا «قىلقىندىرىپ ولتىرگەنىن» مويىنداپ، حالىقارالىق قاۋىمداستىقتىڭ قاتاڭ سىنىنا ۇشىرادى. بۇل تاراپ «حاشوگگي ىسىنە» قاتىسى بار ون سەگىز ادامدى تۇتقىنعا الدى جانە جوعارى شەندى بەس كەڭەسشىنى لاۋازىمىنان ايىردى.

"The Qazaq Times"