لاتۆيا رەسەيدەن تاۋەلسىزدىك العانىن اتاپ ءوتتى

لاتۆيا رەسەيدەن تاۋەلسىزدىك العانىنا 100 جىل تولعانىن اتاپ ءوتتى.

18 قاراشا ليتۆا، ەستونيا، فينليانديا، يسلانديا باسشىلارى لاتۆيا پرەزيدەنتى رايموندس ۆەيونيسپەن بىرلەسە وتىرىپ ريگاداعى ەركىندىك مونۋمەنتىنە گۇل شوقتارىن قويىپ، اسكەري پاراد تاماشالادى. ءوز مالىمدەمەسىندە ۆەيونيس: «ءبىراز ۋاقىت كولەمىندە بارشامىز بىرگە ەگەمەندىك ءۇشىن كۇرەستىك. تاعدىرىمىزدى امان ساقتاپ قالدىق. تاۋەلسىزدىك پەن حالقىمىز قول جەتكىزگەن جەتىستىكتەردى ماقتان ەتەمىز!»، – دەدى. اسكەري پارادتان سوڭ لاتۆيا ۇلتتىق تەاترىندا ارنايى شارا ءوتتى. وسىدان 100 جىل بۇرىن اتالعان تەاتردا لاتۆيا ءوز تاۋەلسىزدىگىن جاريالاعان.

بالتىق بويىنداعى ەلدەر دەربەس مەملەكەت اتانعان سوڭ، كسرو جانە رەسەيمەن بايلانىسى بار تاۋارلار، اقپارات قۇرالدارىنان وقشاۋلانا باستادى. 2014 جىلى رەسەي ۋكراينادان قىرىمدى اننەكسيالاپ، دونباسستاعى قاقتىعىسقا قاتىسقاننان كەيىن لاتۆيا مەن ليتۆا ماسكەۋدىڭ جۇرگىزىپ وتىرعان ساياساتىنا ۇركە قارادى. سول سەبەپتى بىلتىر ناتو رەسەيدەن تونەتىن قاۋىپكە قارسى تۇرۋ ءۇشىن ءتورت باتالون ورنالاستىردى. ليتۆانىڭ اقش-تاعى ەلشىسى رولانداس كريشيۋناس: «كسرو تۇسىندا نەبىر قورقىنىشتى، سۇراپىل كۇندەر بولدى. ناعىز قاتىگەز كەزەڭ ەدى. سول ۋاقىتتا وراق پەن بالعانى بەتكە ۇستاعان ادام شوشىرلىق، جانتۇرشىگەرلىك قىلمىستار ورىن الدى. سوۆەت بيلىگىنىڭ قول استىندا جۇزدەگەن مىڭ ليتۆالىقتار اياۋسىز قىرعىنعا ۇشىرادى، جەر اۋدارىلدى، جازىقسىز تۇرمەگە جابىلدى. سوندىقتان دا كەشەگى كەزەڭنىڭ اياۋسىز تۇستارىن كورسەتەتىن، جاپپاي قىرعىندى دارىپتەيتىن كيىم-كەشەكتەر مەن وزگە ونىمدەردى تاراتۋعا تۇبەگەيلى قارسىلىق بىلدىرەمىز»، – دەگەن بولاتىن. وسى ۇندەۋدەن سوڭ، لاتۆيا، ليتۆا مەن ەستونيا بيلىگى كسرو-نى دارىپتەيتىن كاسىپورىن تاۋارلارىن ساتىلىمنان الىپ تاستاۋ كەرەكتىگىن ايتتى. مۇنىمەن قوسا، بالتىق بويى ەلدەرىنىڭ باسشىلارى Walmart كومپانياسىنا «توتاليتارلىق رەجيمنىڭ قۇربانى اتانعان ميلليونداعان ادامدارعا ەشقانداي قۇرمەت كورسەتپەيتىنى وتە وكىنىشتى. سونىمەن قاتار، بۇل كاسىپورىن ادام قۇقىقتارىن اياققا تاپتاپ، دەموكراتيانى جوققا شىعارۋ ارقىلى توتاليتارلىق جۇيە جايلى بارىنشا ناسيحات جۇرگىزىپ وتىرعانىن» ايتىپ، ۇندەۋ جولداعان.

ايتا كەتەيىك، 1918 جىلعا دەيىن بالتىق تەڭىزى جاعالاۋىندا ورنالاسقان ليتۆا، لاتۆيا، ەستونيا ەلدەرى رەسەي يمپەرياسىنىڭ قۇرامىندا بولدى. ال 1940 جىلدارى اننەكسيالانىپ، 1991 جىلعا دەيىن كەڭەس وداعىنىڭ قۇرامىندا بولدى. ەگەمەندىك العاننان كەيىن، اتالعان مەملەكەتتەر 2004 جىلى ەۋروپا وداعى مەن ناتو قۇرامىنا ەندى.

"The Qazaq Times"