ناتو كۇشتەرى. فوتو: NATO.

فرانتسيا پرەزيدەنتىنىڭ ەممانۋەل ماكرون العا قويعان جانە قازىر ەو ەلدەرىندە قىزۋ تالقىداعى ەۋروپا ارمياسىن قۇرۋ تۋرالى باستاماعا، ناتو باس حاتشىسى ءوز پىكىرىن ءبىلدىردى. يەنس ستولتەنبەرگ گەرمانيا باسىلىمدارىنىڭ بىرىنە بەرگەن سۇحباتىندا اتالعان «ەۋروپالىق ارميانىڭ» ناتو-عا بالاما بولا المايتىنىن ايتتى.

ۇيىمنىڭ باس حاتشىسى ستولتەنبەرگ سوزىندە: «ەۋروپانىڭ بۇل تالپىنىسى مەنى قۋانتادى. بۇل ناتو-نىڭ جۇگىن جەڭىلدەتەدى. ەڭ ماڭىزدىسى ەۋروپانىڭ قورعانىس قۋاتىنىڭ بولشەكتەنۋدەن ساقتاپ قالار ەدى. دەگەنمەن، ەۋروپا ارمياسىنىڭ بولۋى ناتو-عا التەرناتيۆا ەمەس»، – دەدى.

كەزەكتى سۇحباتىندا ستولتەنبەرگ ەۋروپا ارمياسىن قۇرۋ باستاماسىنىڭ  ناتو-عا ەۋروپا قاناتىن كۇشەيتۋدى ەسكەرتۋمەن بىردەي ەكەنىن راستايدى.

فرانتسۋزدىڭ جاس پرەزيدەنتى العا قويعان باستاما، ناتو-عا ءوز ىقپالىن تيگىزۋى مۇمكىن. قازىر ناتو سىندى الىپ قورعانىس ىنتىماقتاستىعىن  ۇلكەن وزگەرىستەر كۇتىپ تۇرعانى انىق بايقالادى. اقش تاعىنا ترامپ كەلگەننەن بەرى، ناتو-عا ۋاشينگتوننىڭ قاباعى بۇرىنعىداي بولماي قالدى. ترامپ ۇكىمەتى ەۋروپا مەن وزگە وڭىرلەردەگى ەلدەردىڭ قاۋىپسىزدىگىنە كوبىرەك كەرەكتى ۇيىمعا، قۇراما شتاتتىڭ ارتىعىمەن قارجى ءبولۋىن ادىلدىك دەپ سانامادى.

قۇراما شتات ءوزىنىڭ تىنىق مۇحيتتاعى ارىپتەسى قىتايمەن تۋىلۋى ىقتيمال قاقتىعىسقا نازار اۋدارۋى كەرەك دەپ تاپتى. ال، قۇرامىندا سونشاما كوپ ەلدىڭ بولۋى دا بۇل ۇيىمنىڭ جاۋاپكەرشىلىگى مەن قىزمەتىن اۋىرلاتا ءتۇستى.  ارى، رەسەيدەن تونەتىن قاۋىپ پەن تەرروريزم قاۋپى ەۋروپانىڭ ۇيقىسىن بۇزۋدا. ەۋروپالىق ارميا قۇرۋ باستاماسىنىڭ كوتەرىلۋىنە دە بۇل نەگىزگى سەبەپ بولدى.

“The Qazaq Times”