اۋدان اكىمىنىڭ ارداگەر اقساقالدى الداعانى راس پا؟

الماتى وبلىسىنىڭ اقسۋ اۋدانىندا كوممۋنالدىق قىزمەت وتان سوعىسىنىڭ ارداگەرىن سوتقا بەرىپ، زەينەتاقىسىنىڭ جارتىسىن قيىپ العان. ەلى مەن جەرى، بولاشاق ۇرپاعى ءۇشىن مايداندا ەرلىك كورسەتكەن سوعىس ارداگەرى ەرمۇحان رىسبەكوۆ زەينەتاقىسىنان قيىلعان 45 مىڭ تەڭگەگە بولا ەمەس، قادىرىنىڭ قالماعانىنا قىنجىلىپ وتىر، دەپ جازدى stan.kz سايتى 31 ارناعا سىلتەمە جاساپ.

ال، اتاسىن 16 جىل بويى ءوزى قاراپ وتىرعان داناگۇل كوممۋنالدىق قىزمەتتەگىلەردىڭ ارەكەتىن اقشانى العاننان كەيىن بىراق بىلدىك دەيدى. وسىعان دەيىن كوممۋنالدىق قىزمەتكە قارىز بولىپ كورمەگەن قاريانىڭ وتباسى بۇل جايتقا اۋدان اكىمىن كىنالاپ وتىر.

94 جاستاعى سوعىس ارداگەرىن 16 جىل بويى قاراپ كەلگەن نەمەرەسى داناگۇلدىڭ سوزىنشە،  اقسۋ اۋدانىنىڭ اكىمى ادىلبەك دالعاباەۆ بيىلعى جىلى جىلۋدىڭ اقشاسىن ءوزى تولەۋگە ۋادە بەرگەن ەكەن.

«ءوزىمىزدىڭ اقسۋ اۋدانىنىڭ اكىمى ادىلبەك دالعاباەۆ كەلىپ، ءبىزدىڭ جاعدايىمىزعا قاراپ، ەكى جىلىتقىش اكەپ بەردى. ەندى  جىلىتقىش قوسىڭىزدار، مەن جارىقتىڭ دا جىلۋدىڭ دا اقشاسىن ءوز قالتامنان تولەپ بەرەمىن دەدى. بىلدەي ءبىر اۋدانىمىزدىڭ اكىمى بولعان سوڭ سول كىسىنىڭ سوزىنە سەنىپ قالدىق»،-دەيدى سوعىس ارداگەرىنىڭ نەمەرەسى داناگۇل ەرمۇحانوۆا.

دەگەنمەن،  اۋدان اكىمى بۇل ءسوزىن جوققا شىعارۋدا. ول جىلۋدىڭ اقشاسىن تولەيمىن دەپ ۋادە بەرگەن جوقپىن دەپ، سوزىنەن تايدى.

«جىلۋدى تولەپ بەرەمىن دەپ ۋادە بەرگەن جوقپىن. كەتكەن ەلەكتر ەنەرگيا جۇيەسىن جىلىتقىشتار تۇرعاننان ءبىز تولەپ بەرەمىز دەپ ۋادە بەرگەنبىز. ونى تۇگەل تولەپ بەردىك، قۇجاتتارى قولىمدا. ىلعي ۇلكەن اقساقالدى الدىنا سالىپ، سول كىسىنىڭ اتىن جامىلىپ، ءوزى جۇمىس جاسامايدى»، – دەيدى اقسۋ اۋدانىنىڭ اكىمى ادىلبەك دالعاباەۆ.

ال، الدانعان 94 جاستاعى قاريا ءوزىن سوتقا بەرگەندەر جايلى ءسوز قوزعامادى. دەگەنمەن، سوعىس ارداگەرى وسىدان 5 جىل بۇرىن  بەرىلگەن پاتەردى  دە ءالى ءوز اتىنا جازدىرا الماي وتىرمىن دەپ، ناليدى.

«سونىڭ قۇجاتىن بەرمەي وتىر. ول قالاي ەكەنىن بىلمەيمىن. ءۇيدىڭ قۇجاتىن ءالى بەرمەدى، نە ءۇشىن بەرمەي وتىر تۇسىنبەيمىن»،-دەيدى ۇوس ارداگەرى ەرمۇحان رىسبەكوۆ.

وسىدان بەس جىل بۇرىن ارداگەرگە بەرىلگەن كوپقاباتتى ۇيدە بىردە ءبىر بالكون جوق كورىنەدى. ال، تۇرعىندار ءۇيدىڭ قابىرعالارى تىم جۇقا سالىنعاندىقتان ءۇي قىستا اڭىراپ، پانا بولمايدى دەپ شاعىمدانۋدا.

ارامىزدان قاتارى سيرەپ قالعان ارداگەرلەردىڭ سوڭعىلارىنىڭ ءبىرى وسى ەرمۇحان اتامىز. وتان دەپ وتقا تۇسكەن اقساقالدىڭ ەندىگى قالعان از عانا ومىرىندە تارتان بەينەتىنىڭ زەينەتىن كورۋگە اۋدانداعى اتقا مىنەرلەردىڭ ات سالىسىپ جىبەرمەگەنى كىسىنى قىنجىلتادى. اۋدان اكىمى دالعاباەۆ مىرزا اقساقالدى دالاعا قالدىرماس، قالاي بولسا دا قاريانىڭ كوڭىلىن تابار وڭ شەشىم جاسار دەگەن سەنىمدەمىز.

“The Qazaq Times”