تاجىكستان پرەزيدەنتى ەمومالي راحمون ايماقتىق كوشباسشىلارعا «مۇراگەرىن» تانىستىرماق

تاجىكستان پرەزيدەنتى ەمومالي راحمون ايماقتىق كوشباسشىلارعا «مۇراگەرىن» تانىستىرماق.

قاراشا ايىنىڭ 16-ى كۇنى رەسمي دۋشانبە ۇلكەن مەرەكەگە دايىندالۋدا. ءدال وسى كۇنى ەل پرەزيدەنتى ەمومالي راحموننىڭ ءومىر بويى جەتكەن جەتىستىكتەرىنىڭ الدىڭعى قاتارىنان ورىن الاتىن روگۋن گيدرو ەلەكتر ستانتسياسىنىڭ العاشقى تۋربيناسى ىسكە قوسىلادى دەپ جوسپارلانۋدا. تاجىكستان بيلىگى پرەزيدەنت كۇنىمەن تۇسپا-تۇس كەلگەن بۇل ايتۋلى داتاعا قازاقستان، وزبەكستان، قىرعىزستان، تۇركىمەنستان جانە رەسەي ەلدەرىنىڭ پرەزيدەنتتەرى مەن ۇكىمەت باسشىلارىن شاقىرعان. ءبىر قاراعاندا بەس بىردەي مەملەكەتتىڭ باسشىلارىن جينايتىنداي اناۋ ايتقانداي ماڭىزدى شارا بولىپ كورىنبەگەنىمەن بۇندا وزىندىك ساياسي استار بار.

ساراپشىلار پىكىرىنشە، ەمومالي راحمون «عاسىر قۇرىلىسىنا» بالانعان روگۋن گەس-ءنىڭ اشىلۋ سالتاناتىنا بەس بىردەي مەملەكەت باسشىسىن شاقىرۋ ارقىلى وزگەرىسسىز ومىردەن قاجىعان تاجىكستان حالقىنا «عاسىر قۇرىلىسىنىڭ» قانشالىققا ماڭىزعا يە ەكەندىگىن كورسەتپەك. ەكىنشىدەن، وسى ارقىلى روگۋن قۇرىلىسىنا ينۆەستيتسيا تارتپاق. ۇشىنشىدەن، ايماقتىق كوشباسشىلارعا وزىنەن كەيىنگى تاق «مۇراگەرى»، ۇلى رۋستام ەموماليدى تانىستىرماق.

نەگىزىندە ەمومالي راحمون كونستيتۋتسيا بويىنشا ءومىر بويى پرەزيدەنت بولىپ سايلانۋعا قۇقىلى. بىراق سەكۋندتار جىلجىپ، ساعاتتار سىرعىعان سايىن ءومىر بويى پرەزيدەنت بولعانىمەن ولمەۋ مۇمكىن ەمەس ەكەندىگىن كەز كەلگەن سانالى ادام تۇسىنەتىنى انىق. وزبەكستان ەكس-پرەزيدەنتى يسلام كارىموۆ دۇنيەدەن وزعاننان كەيىن بۇل تابيعاتتىڭ زاڭدىلىعى ايماقتىڭ اقساقالدارى اتانعان قازاقستان پرەزيدەنتى نۇرسۇلتان نازارباەۆ پەن ءدال وسى ەمومالي راحمونعا قاتتى سەزىلگەن ءتارىزدى.

بىراق سالىستىرمالى تۇردە العاندا ەمومالي راحمون ءالى جاس. 1952 جىلى دۇنيەگە كەلگەن ول، بيىل نەبارى 66 جاسقا كەلدى. ونىڭ رەسەيلىك ارىپتەسى ءارى قۇرداسى ۆلاديمير ءپۋتيننىڭ سوڭعى كەزدەرى جاساعان مالىمدەمەلەرى مەن جۇمىس ىستەۋ قارقىنىنا قاراپ، ۇلكەن ساياساتتان جاقىن ۋاقىتتا كەتەدى دەپ ايتا المايسىڭ. دەسە دە، وزگەلەرمەن سالىستىرعاندا ەمومالي راحمون وتباسىلىق جاعداي تۇرعىسىندا جولى بولعان پرەزيدەنتتەردىڭ قاتارىندا. نەگە دەيسىز بە؟ ويتكەنى ونىڭ ءىسىن جالعاستىراتىن، پرەزيدەنتتىك كرەسلونى اتادان بالاعا ميراس ەتىپ قالدىراتىن «مۇراگەرى»، ۇلى بار. قازىردىڭ وزىندە ەل اراسىندا «بولاشاق تاجىكستان پرەزيدەنتى» سانالاتىن رۋستام ەمومالي دۋشانبە قالاسىنىڭ مەرى جانە رەسپۋبليكادا بولىپ جاتقان كەز كەلگەن باستامانىڭ قوزعاۋشى كۇشى. تاجىكستاندا قانداي دا ءبىر ساياسي ناۋقان نەمەسە قاراپايىم الەۋمەتتىك شارالار وتەتىن بولسا، ەمومالي راحموننان كەيىن ءدال وسى رۋستامنىڭ ەسىمى اتالادى. بۇل دەگەنىمىز جوعارىدا ايتىلعان ساراپشىلاردىڭ «مۇراگەر تانىستىرۋ» وپەراتسياسىنىڭ قاراشادا بولۋ ىقتيمالدىعىن ارتتىرادى.

"The Qazaq Times"