اقش سولتۇستىك كورەيادان جاسىرىن زىمىران بازالارىن تاپتى

اقش سولتۇستىك كورەيادا جاسىرىن ساقتالعان جيىرماعا جۋىق زىمىران بازاسىن تاپتى. بۇل تۋرالى ۋاشينگتونداعى ستراتەگيالىق جانە حالىقارالىق زەرتتەۋلەر ورتالىعى حابارلادى.

«Reuters» اگەنتتىگىنىڭ مالىمەتىنشە، بازالاردا ءارتۇرلى قاشىقتىقتاعى بالليستيكالىق زىمىراندار بار جانە ولار زىمىران ارسەنالىن ساقتاۋ ءۇشىن قولدانىلادى. قازىرشە 13 بازانىڭ ناقتى قاي جەرگە جاسىرىلعانى انىقتالدى. جەرسەرىكتەن تۇسىرىلگەن سۋرەتتەردە پوليگوندار سولتۇستىك كورەيانىڭ تاۋلى ايماقتارىندا ورنالاسقان. بىراق، اسكەريلەر زىمىراندى ىسكە قوساتىن قوندىرعىلاردىڭ انىقتالماعانىن ايتادى.
پيوڭياڭدا اسكەري نىساندار ءالى كۇنگە دەيىن جۇمىسىن توقتاتپاعان. امەريكالىق ساراپشىلاردىڭ ايتۋىنشا، سولتۇستىك كورەيا تاراپى جاسىرىن بازالاردى حالىقارالىق باقىلاۋشىلاردان جاسىرماق بولعان جانە توتەنشە جاعدايلار ورىن السا، بازالاردان زىمىرانداردىڭ اتىلۋى ىقتيمال. وسى رەتتە ساراپشى دجوزەف بەرمۋدەس: «پيوڭياڭ وزگە زىمىران بازالارىن جاسىرىپ قالۋ ماقساتىندا، «سوحە» زىمىران پوليگونىن جاريا ەتىپ بۇزعان. مۇنىمەن شەكتەلمەي، كحدر بيىل مامىردا «پۋنگەري» پوليگونىن داتاس-تالقان ەتتى. ال نىساندى قيراتۋعا شەتەلدىك ماماندار مۇلدە قاتىستىرىلعان جوق. دەمەك، زىمىراندار جاراقتالماعاننىڭ وزىندە ايتارلىقتاي قاۋىپ توندىرە الادى»، – دەيدى.

ايتا كەتەيىك، 12 ماۋسىمدا سينگاپۋردە العاش رەت اقش پەن سولتۇستىك كورەيا باسشىلارىنىڭ ءسامميتى وتكەن بولاتىن. اقش پرەزيدەنتى دونالد ترامپ پەن سولتۇستىك كورەيا باسشىسى كيم جوڭ ىن كەلىسسوزدەر قورىتىندىسى بويىنشا ورتاق قۇجاتقا قول قويدى. وندا پيوڭياڭ كورەي تۇبەگىن يادرولىق قارۋدان تولىق بوساتۋعا دايىن ەكەنىن حابارلاپ، ال اقش وعان قاۋىپسىزدىككە كەپىلدىك بەرۋە مىندەتتەلگەن بولاتىن. سامميت قورىتىندىسى بويىنشا يادرولىق قارۋدان باس تارتۋعا شەشىم شىعارىلىپ، قوس تاراپتىڭ باقىلاۋشىلارى كحدر-ءدىڭ يادرولىق باعدارلامادان باس تارتۋ تۋرالى كەلىسىمىن قاداعالاۋى قاجەت. الايدا، امەريكالىق بارلاۋ قوس ەل باسشىسى اراسىندا ۋاعدالاستىق بولعانىنا قاراماستان، كحدر يادرولىق قارۋ جاساۋدى ءالى جالعاستىرۋدا دەپ حابارلاعان ەدى. ال سولتۇستىك كورەيا تاراپى اقش پەن وڭتۇستىك كورەيانى كورەي تۇبەگىندەگى شيەلەنىستى باسەڭسىتەتىن كەلىسىمدى بۇزىپ، قايتادان اسكەري جاتتىعۋ وتكىزىپ جاتىر دەپ ايىپتاعان.

"The Qazaq Times"