Samsung كومپانياسى جاڭا جينالمالى تەلەفوننىڭ ۇلگىسىن تانىستىردى

وتكەن سارسەنبىدە سان-فرانتسيسكو قالاسىندا Samsung كورپوراتسياسى كوپتەن كۇتكەن جاڭا جينالمالى تەلەفوننىڭ پەرەزەنتاتسياسىن جاسادى.  ولاردىڭ ايتۋىنشا، بۇل  2019 جىلدىڭ تەحنولوگيا سالاسىنداعى باستى جاڭالىقتاردىڭ ءبىرى بولماق.

Samsung كومپانياسى بۇل تەحنولوگيانى جاساۋ ءۇشىن سوڭعى بىرنەشە جىل بويى Google-مەن بىرلەسىپ جۇمىس ىستەگەن. كومپانيانىڭ باعدارلامالىق جاساقتاما توبى مۇشەلەرىنىڭ ايتۋىنشا، سمارتفون كۇتكەننەن دە اسىپ تۇسكەن. ول جاي عانا يىلمەيدى، سونىمەن بىرگە، ەكرانى كىتاپ سەكىلدى جابىلعان كەزدە دە ەكىنشى قوسىمشا ەكران پايدا بولادى.  ياعني، جينالمالى تەلەفون ەكى ديسپلەيدەن تۇرادى. گادجەت تولىقتاي اشىلعان كەزدە پلانشەتتى ەسكە سالسا، ونى كىتاپ سياقتى جاپقان كەزدە قالتاتەلەفونعا ۇقسايدى. پلانشەت تۇرىندەگى ديسپلەيى - 7,3 ديۋيم، ال جاپقان كەزدەگى ديسپلەيى - 4,5 بولماق.

اتالعان كومپانيانىڭ ماركەتينگ جونىندەگى ۆيتسە-پرەزيدەنتى دجاستين دەنيسون  پرەزەنتاتسيا بارىسىندا  بۇل گادجەتتىڭ بولاشاق سمارتفوندار ءۇشىن جاڭا باستاما بولاتىنىن اتاپ ءوتتى.  سەبەبى، ەكراننىڭ ءوندىرىسى بارىسىندا ارنايى يكەمدى جانە قاتتى پوليمەرلەر پايدالانىلعان. سونداي-اق، ديسپلەيدىڭ وڭاي ءيىلىپ، جابىلۋى ءۇشىن پانەلىن Samsung باسقا ءموبيلدى قۇرىلعىلاردىڭ پانەلىنە قاراعاندا وتە جۇقا ەتىپ جاساۋعا تىرىسقان. ياعني، اتالعان گادجەتتىڭ پانەلى  باسقالارمەن سالىستىرعاندا 45 پايىزعا جىڭىشكە. بىراق، ونىڭ جىڭىشكە بولۋى ەكران ساپاسىنىڭ قۇرتىلۋىنا اسەر ەتپەيدى.

گادجەتتىڭ قالتاتەلەفون تۇرىندەگى قىزمەتى شەكتەۋلى:  ان تىڭداۋ، قوڭىراۋ شالۋ، نە قىسقا بەينەباياندار كورۋگە عانا ىڭعايلى، ال كىتاپ وقۋ نەمەسە ويىن ويناۋ سەكىلدى دۇنيەلەر پلانشەت تۇرىندە تيىمدىرەك.  سونداي-اق، مۇندا ءبىر مەزەتتە ءۇش باعدارلامانى (اعىلشىن تىلىندە- app, ورىسشا - پريلوجەنيە) قاتار قولدانۋعا مۇمكىندىك بار.

ءبىر مەزگىلدە ءۇش باعدارلامانى قولدانۋدىڭ ۇلگىسى

كومپنايا Android-كە نەگىزدەلگەن جاڭا قۇرىلعىنى 2019 جىلدىڭ ءبىرىنشى جارتىسىندا ساتىلىمعا قويۋدى جوسپارلاپ وتىر. سونىمەن بىرگە، جاڭا گادجەتتىڭ ازىرگە رەسمي اتاۋى جوق. الدىن الا بولجام بويىنشا، اتاۋى - Galaxy F بولۋى مۇمكىن.

جالپى، سوڭعى كەزدەرى Samsung سمارتفوندارىن ساتۋ نە ساتىپ الۋ كولەمى ازايعان. ماسەلەن، IDC زەرتتەۋ ورتالىعىنىڭ مالىمەتىنشە، Samsung سمارتفوندارىنىڭ جەتكىزىلىمدەرى شىلدە-قىركۇيەك ايلارىندا 13,4 پايىزعا تومەندەگەن.  ورتالىقتىڭ وسى سالاداعى  قىزمەتكەرى مارتا پانتانىڭ سوزىنشە: "ارتۇرلىلىك وتە ماڭىزدى.  سەبەبى، Samsung سمارتفوندارىنىڭ ساتىلىمى Huawei جانە باسقا قىتايلىق برەندتەرمەن باسەكەلەستىككە تاپ بولعاندىقتان، تومەندەپ وتىر. ەگەر كومپانيا نارىققا شىن مانىسىندە جاڭا ءارى ەرەكشە قۇرىلعى اكەلسە، وندا نارىقتى جاۋلاپ الارى ءسوزسىز". ال، ساراپشىلاردىڭ ايتۋىنشا، اتالعان جينالمالى تەلەفون  Samsung برەندىن ودان ءارى نىعايتىپ، دامىتۋعا جانە قولدانۋشىلاردىڭ برەندكە دەگەن قىزىعۋشىلىعىن ارتتىرۋعا سەپتىگىن تيگىزەدى.

"The Qazaq Times"