كيسسيندجەردىڭ بەيجىڭ ساپارى . فوتو: VOA.

اقش پەن قىتايدىڭ باسشىلارى قاراشانىڭ سوڭىندا ارگەنتينادا وتەتىن «ۇلكەن جيىرمالىق» (G20) ءسامميتى كەزىندە كەزدەسۋگە ۋاعدالاستى. قىتاي باسشىسى شي جينپيڭ بەيسەنبى كۇنى مالىمدەمە جاساپ، بەيجىڭ تارابىنىڭ كەلىسسوز ارقىلى اقش-قىتاي اراسىنداعى قالىپتاسقان شيەلەنىستەردى شەشۋگە تالپىناتىنىن، الايدا قۇراما شتاتتار قىتايدىڭ ءوزىنىڭ تاڭداعان جولىمەن دامۋ قۇقىعىن قۇرمەتتەۋ كەرەك ەكەنىن جەتكىزدى. شي جينپيڭ بۇل پىكىرىن بەيسەنبى كۇنى بەيجىڭدە اقش-تىڭ بۇرىنعى مەملەكەت حاتشىسى كيسسيندجەرمەن كەزدەسكەن كەزدە ورتاعا سالدى.

قىتايدىڭ حالىقارالىق ساۋدا جانە وڭىرلىك قاۋىپسىزدىككە بايلانىستى ساياساتى حالىقارالىق قاۋىمداستىقتىڭ سىن-پىكىرىنە ۇشىرادى. اقش قىتايدان قۇرىلىمدىق رەفورمالار جاساپ، ءادىل ساۋدا ساياساتىن ورناتۋدى تالاپ ەتتى. سارسەنبى كۇنى اقش پرەزيدەنتتى دوناللد ترامپ قىتايدىڭ 2025 ستراتەگياسىن تاستاپ، الەمدىك ساۋدا اينالىمىندا باتىس ەلدەرىمەن بىرگە تۇرۋى كەرەك ەكەنىن ايتتى. الايدا، بۇل ايتىلعانداردى قازىرشە قىتاي بيلىگى قابىلدار ەمەس.

قىتاي باسشىسى كيسسيندجەرمەن كەزدەسۋ كەزىندە، ارگەنتيناداعى سامميت كەزىندە بۇل تۋرالى پرەزيدەنت ترامپپەن پىكىر الماساتىنىن ايتىپ ءوتتى. اقش-قىتاي ساۋدا سوعىسىنا بايلانىستى، الەم ەلدەرىنىڭ ۇكىمەتتەرى مەن اقپارات قۇرالدارى وسى ايدىڭ سوڭىندا بولاتىن ترامپ-شي اراسىنداعى كەزدەسۋگە كوز تىگۋدە. كيسسيندجەردىڭ بەيجىڭ ساپارى دا الداعى كەلىسسوزدىڭ كەدەرگىلەرىن ازايتۋ ماقساتىندا جاسالعان. ەكى ەل باسشىلارى قانداي كەلىسىمگە كەلەتىنىن بولجاپ ايتۋ قيىن. سەبەبى، بۇل تەكەتىرەس ەكى ەلدىڭ دە ءتۇبىرلى مۇددەلەرىنىڭ قايشىلىعىنان كەلىپ شىققان.

“The Qazaq Times”