پەتروپاۆل ءوڭىرىنىڭ تۇرعىندارى "قالاعا كىرۋ جانە شىعۋ جولدارى قوس ەل باسشىلارى كەلگەن ۋاقىتتا تولىعىمەن جابىلادى"  دەگەن قاۋەسەتكە الاڭداۋلى. الايدا، قازاقستان مەن رەسەي پرەزيدەنتىنىڭ كەزدەسۋى ەشقانداي دا قولايسىزدىق تانىتپايدى دەدى جەرگىلىكتى بيلىك باسشىلارى. سونىمەن قاتار، VIP-قوناقتار تەك ارنايى ورىنداردا عانا توبە كورسەتەتىندىگىن تىلگە تيەك ەتتى. بۇل تۋرالى sputniknews مالىمدەپ وتىر.

8-ءشى قاراشا كۇنى پەتروپاۆل قالاسىندا قازاقستان مەن رەسەي پرەزيدەنتتەرى نۇرسۇلتان نازارباەۆ پەن ۆلاديمير پۋتين قاتىساتىن  XIV وڭىرارالىق ىنتىماقتاستىق فورۋمى وتپەك. اۋقىمدى شارالاردان قۇرالعان مۇنداي كولەمدى جيىن شالعايدا جاتقان وبلىس ءۇشىن تاريحي وقيعا بولاتىندىعى بەلگىلى. وسىعان بايلانىستى جەرگىلىكتى شەنەۋنىكتەر، كاسىپكەرلەر جانە جۋرناليستەر مەن پوليتسەيلەردىڭ دە تۇرعىندارمەن قاتار قوبالجىپ جۇرگەندىگى جاسىرىن ەمەس.

فورۋم كۇنى شاعىن قالادا كەپتەلىس ورناپ، جۇمىسقا كەشىگىپ قالۋدان سەكەم الىپ وتىرعان جۇرتشىلىق "قالانىڭ كىرىپ-شىعۋ جولى جابىلىپ، بارلىق كوشەلەر بۇعاتتالادى" دەگەن جەلىدە تاراعان الىپ-قاشپا اڭگىمەلەرگە دە قۇلاعىن ءتۇرىپ وتىرعاندىعى راس.

بىراق، سقو اكىمىنىڭ ورىنباسارى داۋرەن جانداربەك تۇرعىنداردى سابىرعا شاقىرىپ، فورۋم اياسىندا كوشەلەردىڭ بارلىعى بىردەي جابىلمايتىندىعىن حابارلاعان.  تەك كورمە مەن فورۋم جانە وزگە دە شارالار وتكىزىلەتىن وقۋشىلار سارايى مەن تەننيس ورتالىعىنىڭ ماڭى عانا بۇعاتتالاتىندىعىن ناقتى مالىمدەدى. سول سەكىلدى، پوليتسيا دەپارتامەنتىنىڭ ءباسپاسوز قىزمەتى دە قالاعا كىرەر جولدىڭ كۇندەلىكتى كەستە بويىنشا قوزعالىس جاساي بەرەتىندىگىن ەسكەرتكەن. الايدا، قالاداعى ءتارتىپ ساقشىلارىنىڭ سانى ەسەلەنىپ، تىنىشتىقتى كۇزەتەتىندەردىڭ كوپ بولاتىندىعىن دا جاسىرعان جوق. بۇل ءۇشىن قوعامدىق ءتارتىپ ساقتاۋ ماقساتىندا كورشى وبلىستاردىڭ پوليتسيا قىزمەتكەرلەرى دە جۇمىلدىرىلماق. قوسىمشا شاقىرتۋ العان 200 پوليتسيا شارالار وتكىزىلەتىن ورىندارداعى ءتارتىپتى باقىلاۋدا ۇستاپ، ارنايى كولىكتەر مەن كولوننالارعا اۆتوپاترۋلمەن ىلەسىپ ءجۇرۋ مىندەتتەلگەن.

ەستەرىڭىزگە سالا كەتەيىك، 2016 جىلى ءدال وسىنداي فورۋم پەتروپاۆل قالاسىندا ءوتۋى ءتيىس بولعان. بۇل ءۇشىن ارنايى قارجى ءبولىنىپ، دايىندىقتا باستالىپتى. الايدا، سوڭىندا شارانى استانادا وتكىزۋ تۋرالى شەشىم قابىلدانعان. سول كەزدە قالانىڭ ينفراسترۋكتۋراسى شىن مانىندە اۋقىمدى فورۋمدى وتكىزۋگە دايىن بولماعاندىعى بەلگىلى. ءتىپتى، اۋەجايدىڭ ءوزى دە ساي كەلمەگەندىگى راس. بىراق اراعا ەكى جىل سالىپ، بارلىعىن قايتادان جوندەۋدەن وتكىزگەن پەتروپاۆل ءوڭىرى بيىل سىرتتان كەلەر قوناقتاردى قارسى الۋعا ابدەن دايىن.

“The Qazaq Times”