اقش پرەزيدەنتى دونالد ترامپ كونگرەسكە وتەتىن ارالىق سايلاۋدىڭ الدىن الا قورىتىندىسىن ءوزىنىڭ Twitter پاراقشاسىندا «كەرەمەت جەتىستىك» دەپ باعالادى.

دونالد ترامپتىڭ رەسپۋبليكالىق پارتياسى سەناتتا ساعات سايىن بەلسەندىلىگىن كورسەتىپ كەلەدى. «The New York Times» حابارلاعانداي، رەسپۋبليكالىقتاردىڭ 100-دەن كەم دەگەندە 51 لاۋازىمعا يە بولۋ مۇمكىندىگى بار. Fox News ەسەپتەۋىنشە، ولار جيناعان داۋىستار جوعارعى پالاتادا 52 ورىنعا جەتۋى مۇمكىن، ال دەموكراتتار ازىرگە 44 داۋىسپەن ەكىنشى ورىندا. ءوز كەزەگىندە دەموكراتتار سايلاۋ ناتيجەسى بويىنشا كونگرەسستىڭ تومەنگى پالاتاسى – وكىلدەر پالاتاسىندا كوش باستاپ تۇر.

قازىرگى ۋاقىتتا داۋىستاردى ساناۋ جالعاسۋدا. ازىرشە، دەموكراتيالىق پارتيا 197 (50,5%), ال رەسپۋبليكالىقتار 182 (47,9%) داۋىس جينادى. دونالد ترامپ وكىلدەر پالاتاسىنداعى وپپوزيتسيالىق دەموكراتيا فراكتسياسىن باسقاراتىن نەنسي پەلوسيدى جەڭىسىمەن قۇتتىقتاعان.

سايلاۋدا بيلىكتىڭ ساياسي ماڭىزىمەن قاتار، قىزمەت كورسەتۋ، ۇيىمداستىرۋشىلىق جاعىنا دا كوڭىل بولىنەدى. CNN مالىمەتتەرى بويىنشا، زاڭگەرلەر كوميتەتىنە جەرگىلىكتى تۇرعىنداردان 17,5 مىڭنان استام شاعىم تۇسكەن. ولاردىڭ كوپشىلىگى داۋىس بەرۋگە ارنالعان جاشىكتەرىنىڭ دۇرىس ورنالاسپاعانىنا جانە سكانەرلەر جۇمىسىنىڭ باياۋلىعىنا بايلانىستى.

ەسكە سالا كەتەيىك، 6 قاراشا اقش-تا ارالىق سايلاۋ باستالدى. سايلاۋ ناتيجەسىندە سەناتور، گۋبەرناتورلار جانە كونگرەستىڭ تومەنگى پالاتاسى تولىعىمەن جاڭارتىلادى. ساراپشىلاردىڭ ايتۋىنشا، بۇگىنگى سايلاۋ اقش ازاماتتارىنىڭ قازىرگى پرەزيدەنت، رەسپۋبليكالىق پارتيا كوشباسشىسى دونالد ترامپتى قانشالىقتى قولدايتىنىن بىلدىرەدى. سونداي-اق ەگەر دەموكراتيالىق پارتيا جەڭىسكە جەتەتىن بولسا، ترامپ اكىمشىلىگىنىڭ زاڭنامالىق باستامالارىن بۇعاتتاي الادى.

2016 جىلعى سايلاۋدا كونگرەستىڭ ەكى پالاتاسىندا دا رەسپۋبليكالىقتار باسىم داۋىسقا يە بولعان. سول كەزدە سايلانعان پرەزيدەنت ترامپ سايلاۋ الدىنداعى ناۋقان كەزىندە «حالىقتىڭ سەنىمى قاشان دا جوعارى بولادى» – دەگەن.

"The Qazaq Times"