جۋرناليست حاشوگگيدىڭ ۇلدارى كورول سالمانعا سەنىم ارتىپ وتىر

ستامبۋلداعى ساۋد ارابياسىنىڭ ەلشىلىگىندە ولتىرىلگەن جۋرناليست حاشوگگيدىڭ بالالارى CNN ارناسىنا سۇحبات بەرىپ، اكەلەرىنىڭ ءمايىتىن قايتارمايىنشا وسى ءىستى قۋزاۋدى توقتاتپايتىندارىن ايتتى.

جامال حاشوگگيدىڭ ۇلدارى سالاح حاشوگگي (35 جاستا) مەن ابدۋللاھ حاشوگگي تانىمال تەلەارنانىڭ سۇحباتىن قابىلدادى. ولار ساۋد ارابياسىنىڭ بيلىگىنەن اكەسىنىڭ ءمايىتىن قايتارۋدى تالاپ ەتۋدە. ولار سوزىندە: «اكەمىز باتىل، ءارى ءمارت، مەيىرىمدى ادام ەدى. قازىر ءبىزدىڭ بار تىلەگىمىز اكەمىزدىڭ سۇيەگىن مەديناداعى ءال-باقي مازارىنداعى تۋىستارىمىزدىڭ جانىنا جەرلەۋ. ونىڭ ءمايىتىن بىزگە قايتارمايىنشا وتباسىمىز ازا تۇتپايدى ءارى بۇل ىستە شەشىلمەيدى. بۇل تۋرالى ساۋد ارابياسىنىڭ بيلىگىمەن دە سويلەستىك»، – دەگەن.

ۇلكەن ۇلى سالاح حاشوگگيدىڭ ايتۋىنشا، كوپتەگەن اقپارات قۇرالدارى جانە جەكەلەر بۇل ءىستىڭ ناقتى سىرىن حاشوگگي وتباسىنداعىلار بىلەدى دەپ ويلايتىنىن، الايدا، ءىستىڭ شىن سىرى حاشوگگي وتباسىنا دا بەيمالىم ەكەنىن ايتادى. ول جانە وتباسىنىڭ باسقا مۇشەلەرىنە قارايلاسۋ ماقساتىندا ۋاشينگتوننان ستامبۋلعا قونىس اۋدارعىسى كەلەتىنىن دە ءبىلدىردى.

سالاح حاشوگگيدىڭ ەندىگى ءۇمىتى كورول سالماننىڭ بەرگەن ۋادەسىندە. ساۋد ارابياسىنىڭ پاتشاسى وعان وسى ىسكە قاتىستى بارلىق ادامنىڭ جازاعا تارتىلاتىنىن، ادىلەت جاعىندا تۇراتىنىن ايتىپ ۋادە ەتكەن.

“The Qazaq Times”