ترامپ-كيم اراسىنداعى العاشقى كەزدەسۋ. فوتو: NYT

 

اقش-تىڭ مەملەكەتتىك حاتشىسى مايك پومپەو مالىمدەمە جاساپ، وسى اپتادا نيۋ-يوركتە سولتۇستىك كورەيانىڭ جوعارى لاۋازىمدى وكىلى كيم ياڭمەن يادرولىق قارۋدان باس تارتۋ ماسەلەسى تۋرالى كەلىسسوز وتكىزەتىنىن ايتتى. بۇل تۋرالى VOA جاڭالىقتار قىزمەتى حابارلادى.

سولتۇستىك كورەيانىڭ يادرولىق قارۋدان باس تارتۋى تۋرالى اقش پرەزيدەنتى دونالد ترامپ ماۋسىم ايىندا سينگاپۋردا وتكەن كحدر باسشىسى كيم جوڭ ۋنمەن كەزدەسۋدە ورتاعا قويعان. ودان بەرى تاراپتار بىردە تاتۋ، بىردە قاتۋ مامىلەدە بولىپ كەلدى. ديالوگتار ءۇزىلىپ قالماعانىمەن، سولتۇستىك كورەيانىڭ يادرولىق قارۋلارىن قىسقارتۋ باعدارلامالارى باياۋلاپ قالعان ەدى.

پومپەو وسى اپتادا بولاتىن كەلىسسوزدىڭ يادرولىق قارۋسىزداندىرۋ ىسىندەگى تاماشا وراي ەكەنىن ايتادى. ونىڭ ايتۋىنشا، بۇل كەلىسسوز ارقىلى سولتۇستىك كورەيانىڭ يادرولىق قارۋدان باس تارتۋ ۋاقىتىن جانە باعدارلاماسىن انىقتاۋعا بولادى. اقش-تىڭ قازىرگى ۇكىمەتى بولسا، ترامپتىڭ العاشقى پرەزيدەنتتىك مەرزىمى اياقتالۋدان بۇرىن، ياعني، 2021 جىلى قاڭتارعا دەيىن سولتۇستىك كورەيانى يادرولىق قارۋدان تۇبەگەيلى باس تارتۋ تۋرالى كەلىسىمگە قول قويدىرعىسى كەلەدى.

سولتۇستىك كورەيا بۇل تۋرالى جاساعان مالىمدەمەسىندە، ەگەر قۇراما شتاتتىڭ سولتۇستىك كورەياعا باعىتتاعان سانكتسياسى تولاستاماسا، وندا پيوڭياڭ (پحەنيان) بيلىگى «بايىپتى تۇردە» يادرولىق سىناقتاردى قالپىنا كەلتىرۋدى قاراستىراتىنىن جەتكىزگەن ەدى. الايدا، پومپەو جەكسەنبى كۇنى Fox News ارناسىنىڭ سۇحباتىن قابىلداعاندا بۇل قاۋىپتى جوققا شىعاردى. ول سوزىندە: «مەن بۇل تۋرالى الاڭدامايمىن. ءبىزدىڭ باعىتىمىز ايقىن، ءارى كەلىسسوزگە كەلەتىن قارسى جاقتى دا انىق تۇسىنەمىز. پرەزيدەنت ترامپتىڭ بۇل ماسەلەدەگى باعىتى ايقىن»، – دەدى.

پومپەو قۇراما شتاتتىڭ ءوز ماقساتىنا جەتپەيىنشە ەكونوميكالىق سانكتسيانى توقتاتپايتىنىن قاداپ ايتتى. وسىدان بۇرىن دا اقش سولتۇستىك كورەيا تولىقتاي يادرولىق قارۋسىزدانۋ كەلىسىمىنە قول قويماي تۇرىپ، ەكونوميكالىق قىسىمدى استە بوساڭسىتپايتىنىن جەتكىزگەن. اقش-تىڭ بۇل شەشىمىن سولتۇستىك كورەيا ءوز كەزەگىندە «قاراقشىلىق ارەكەت» دەپ تە باعالاعان بولاتىن.

اقش مەملەكەتتىك حاتشىسى كەلىسسوزدەردىڭ باياۋ ءجۇرىلىپ جاتقاندىعىنا قاراماستان، ەكى ەل اراسىندا قارىم-قاتىناستىڭ جاقسى جاققا بەت الىپ كەلە جاتقانىن ايتادى. «ماۋسىم ايىنداعى تاريحي كەزدەسۋدەن كەيىن ءبىز زىمىران سىناقتارىن كورمەدىك، يادرولىق سىناقتار دا بولعان جوق. ال ءبىز بولساق امەريكالىق اسكەري كۇش-جىگەرىمىزدى سول كۇيى ساقتاپ قالدىق. وسىنىڭ ءبارى جاقسى قادام ەمەس پە؟!»– دەيدى پومپەو.

“The Qazaq Times”