بريتاندىق حابار تاراتۋ سالاسىنداعى Ofcom قاداعالاۋ ورگانى رەسەيلىك RT, «رەن تۆ» جانە «نتۆ مير» تەلەارنالارىن ناسيحاتتىق حابار تاراتقانى ءۇشىن قاتاڭ تەكسەرمەك. بۇل تۋرالى BBC حابارلادى.
ليتۆاداعى تەلە جانە راديوحابارلارىن تاراتۋ جونىندەگى ورتالىق رەسەيلىك تەلەارنالارعا «جالعان حابار تاراتۋشى» دەپ شاعىم تۇسىرگەن. سەبەبى بريتاندىق ليتسەنزيا بويىنشا ەۋروپالىق وداق ەلدەرىنە حابار تاراتاتىن تەلەارنالار ەكىنشى دۇنيەجۇزىلىك سوعىس كەزىنەن ليتۆاعا قاتىستى اقپاراتتاردى 180 گرادۋستا بۇرمالاپ بەرگەن. وسىعان وراي سارسەنبىدە Ofcom باسشىسى شارون ۋايت بريتانيا پارلامەنتىندە «رەسەي تەلەارنالارىنا قاراستى ءبىرشاما شاعىم كەلىپ ءتۇستى. ولار ۇگىت-ناسيحات جۇرگىزۋمەن اينالىسۋى ابدەن مۇمكىن. سول سەبەپتى ءبىز تەكسەرۋ شارالارىن قولعا الدىق» – دەدى.
ۋايتتىڭ ايتۋىنشا، RT تەلەارناسىنا قاتىستى ۋكراينانىڭ شىعىسىنداعى قارۋلى قاقتىعىس، سۇرياداعى جاعداي، سكريپالداردىڭ ۋلانۋى جانە ت. ب. ءارتۇرلى تاقىرىپتاردى قۇبىلتىپ بەرگەنى جانە اقپاراتتىق سوعىس جاساۋدى ماقسات ەتكەنى انىقتالىپ، تەرگەۋ جۇرگىزىلۋدە. قانداي جازا قولدانىلاتىنى Ofcom تەرگەۋى اياقتالعان سوڭ بەلگىلى بولادى.
جالپى رەسەيلىك تەلەارنالار سوڭعى جىلدارى ءجيى سىنعا ۇشىراپ كەلەدى. ەكى جىل بۇرىن Ofcom ليتۆانىڭ شاعىمى بويىنشا «نتۆ مير» تەلەارناسىن قايتا تەرگەگەن بولاتىن. وسى جىلدىڭ مامىر ايىندا RT تەلەارناسى كۇدىككە ءىلىنىپ، ليتسەنزيادان ايىرىلۋعا از-اق قالعان ەدى. وعان سكريپالداردى ۋلادى دەگەن كۇدىكتىلەرمەن فانتازياعا تولى جالعان سۇحبات شىعارۋى سەبەپ بولعان. سول كەزدە Ofcom قاھارىنا ىلىككەن Crosstalk جاڭالىقتار باعدارلاماسى جۇمىسىن ۋاقىتشا توقتاتقان بولاتىن.
شەرزاتتىڭ ءولىمى ىسىنە قاتىستى قۇپيا ۆيدەونى جاريالاۋ كىمگە كەرەك بولدى؟ – ساراپشىلار مەديا سىنى
24 قازان – كىتاپحاناشىلار مەرەكەسى قۇتتى بولسىن!
«ۋچاسكەدەن ارۋاققا كوك حات»: الماتىدا مارقۇمعا كەلگەن شاقىرتۋ
كوميسسيا مەن باقىلاۋشى ەسەبىندەگى ايىرماشىلىق: الماتىدا رەفەرەندۋم قالاي ءوتىپ جاتىر؟
ء"ادىل قازاقستان، ەستيتىن مەملەكەت" ەندى ادۆوكاتتارعا قىسىم جاساي باستادى ما؟
«پسەۆدو-بايقاۋشى» الدە كاسىبي باقىلاۋشى: رەفەرەندۋمدى كىم باقىلايدى؟