كابۋلداعى جارىلىس. فوتو: انادولى.

اۋعانستاننىڭ فاراح پروۆينتسياسىندا جوعارى لاۋازىمدى تۇلعالار مىنگەن تىكۇشاق اپاتقا ۇشىراپ، 20 ادام قازا تاپقان. بۇل تۋرالى فاراك پروۆينتسياسىنىڭ رەسمي مالىمەتىنە سىلتەمە جاساي وتىرپ، اۋعانستاندىق تەلەارنالار حابارلادى.

مالىمەتتەرگە قاراعاندا، تاۋلى انار-دارا ايماعىندا اۋەگە كوتەرىلگەن تىكۇشاق بىرنەشە مينۋتتان كەيىن اپاتقا ۇشىراعان. تىكۇشاقتىڭ قۇلاۋىنا ناشار اۋارايى سەبەپ بولعان. قازا بولعاندار اراسىندا اۋعانستان باتىس ايماقتىق اسكەري قولباسشىسىنىڭ ورىنباسارى جانە فاراح قالاسىنىڭ ءماجىلىس توراعاسى دا بار.

وسىدان ءسال عانا بۇرىن، اۋعانستاننىڭ ورتالىق قالاسى كابۋلدا جانكەشتى جاساعان جارىلىستا 7 ادام قازا تاپقان بولاتىن. كابۋلداعى جارىلىستى ەلدەگى دايش ۇيىمى ءوز موينىنا العان. كولىككە ورناتىلعان بومبامەن جاسالعان جارىلىستا 8 ادام زارداپ شەككەن.

“The Qazaq Times”