تاجىكستاندىق ساياساتكەر "روگۋن" گيدرو ەلەكتر ستانتسياسىنا ەل پرەزيدەنتى ەمومالي راحموننىڭ اتىن بەرۋدى ۇسىندى.

تاجىكستان پارلامەنتىنىڭ تومەنگى پالاتا دەپۋتاتى، دەموكراتيالىق پارتيا جەتەكشىسى سايدجافار ۋسمونزودا "روگۋن" گيدرو ەلەكتر ستانتسياسىنا ەمومالي راحموننىڭ اتىن بەرۋدى ۇسىندى. ونىڭ سوزىنشە، كەڭەستەر وداعى قۇلاعالى بەرى توقتاپ تۇرعان "روگۋن" قۇرىلىسىنىڭ قايتا جاندانۋىنا بىردەن ءبىر مۇرىندىق بولعان مەملەكەت باسشىسى ەمومالي راحمون. ول ءوزىنىڭ وسى شەشىمى ارقىلى تاجىكستاندىقتاردىڭ ءومىر سۇرۋگە دەگەن قۇشتارلىعىن وياتىپ، كوڭىلدەرىنە سەنىم ۇيالاتقان.

جالپى، ورتالىق ازيا ەلدەرىندە مەملەكەت باسشىلارىنىڭ قۇرمەتىنە اۋەجاي نەمەسە ۋنيۆەرسيتەت اتاۋىن بەرۋ داستۇرگە اينالعان. مىسالى، قازاقستاندا پرەزيدەنت نۇرسۇلتان نازارباەۆتىڭ اتىندا مەكتەپ، ۋنيۆەرسيتەت، اۋەجاي، كوشە بار. ال تۇركىمەنستاندا ءتىپتى تۇركىمەنباسى اتتى قالا بار.

"The Qazaq Times"