وزبەكستان پرەمەر-ءمينيسترىنىڭ اۋىل جانە سۋ شارۋاشىلىعى جونىندەگى ورىنباسارى زوير ميرزاەۆ تاشكەنت وبلىسى اققورعان اۋدانىنداعى جانجالدان كەيىن قىزمەتىنەن الىندى.

27 قازاندا التى ەر ادامنىڭ ماقتا القابىنداعى ارىقتاعى سۋدا تۇرعان سۋرەتى الەۋمەتتىك جەلىلەرگە كەڭ تارالعان بولاتىن. ولار القاپ سۋارىلماعاندىقتان، پرەمەر-ءمينيستردىڭ ورىنباسارى جانە جەرگىلىكتى شەنەۋنىكتەردىڭ كوزىنشە، وسىلاي جازالانعان.

بۇل سۋرەت كوپشىلىكتىڭ اشۋ-ىزاسىن تۋعىزعاندىقتان، وزبەكستان پرەزيدەنتى 29 قازاندا ۆيتسە-پرەمەر زوير ميرزاەۆتى قىزمەتىنەن الدى. سول كۇنى ەل پرەزيدەنتى شاۆكات ميرزياەۆ جاۋاپتى باسشىلاردىڭ قىزمەتىن اسىرا پايدالانۋعا بولمايتىنى جانە ءماجبۇرلى ەڭبەككە جول بەرىلمەيتىنى جونىندە جارلىققا قول قويدى.

ارىقتا تىزە بۇگىپ تۇرعان التى ەر ازاماتتىڭ ۇشەۋى اققورعان اۋداندىق اكىمدىگىنىڭ قىزمەتكەرى بولىپ شىققان. بىرەۋى – ماحاللا اقساقالى، ەكەۋى – جەرگىلىكتى فەرمەرلەر.

سول جيىندا بولعان كۋاگەرلەردىڭ ءبىرى التى ازاماتتى 40-45 مينۋت بويىندا سالقىن سۋعا تۇرعىزىپ قويدى، سوسىن ىلعال كيىمدەرىمەن دالادا جۇگىرتتى دەيدى.

29 قازاندا وزبەكستاننىڭ باس پروكۋراتۋراسى بۇل وقيعاعا قاتىستى كىنالىلەر، قىزمەتتەرىنە قاراماستان جاۋاپ بەرەدى دەپ مالىمدەدى.

"The Qazaq Times"