بريتانيا حالقى مەيدىڭ شەشىمىنە قارسى شەرۋگە شىقتى

ۇلىبريتانيا حالقى ەۋروپالىق وداق قۇرامىنان شىعۋعا قاتىستى رەفەرەندۋمدى قايتا وتكىزۋدى تالاپ ەتتى.  

«The Independent» گازەتىندە قىزمەت ەتەتىن ءپۋبليتسيستىڭ ۇسىنىسىمەن كەزەكتى مارتە رەفەرەندۋم وتكىزۋگە قاتىستى ءوتىنىش جازىلعان. وتىنىشتە ايتىلعانداي، بريتانيادا ورىن الىپ جاتقان كەز كەلگەن ساياسي ماسەلەلەردە حالىق داۋىس بەرۋگە جانە سوڭعى پىكىرىن بىلدىرۋگە قۇقىلى. وسىعان وراي، 1 ميلليوننان استام حالىق Brexit جونىندە وتىنىشكە قول قويعان. ولاردىڭ قاتارىندا قوعام قايراتكەرلەرى، بەلگىلى جۋرناليستەر مەن ونەر ادامدارى دا بار.

جالپى ەو-دان شىعۋ جايلى شەشىم قابىلدانعالى بەرى، ۇكىمەت پەن پارلامەنتتەگى بيلىك وكىلدەرىنىڭ پىكىرى ەكىگە جارىلدى. جەرگىلىكتى تۇرعىندار اتالعان شەشىم جۇزەگە اسسا، بريتانيا ەكونوميكاسى قۇلدىراپ، سالىق تولەمىنىڭ ارتۋىنان قاۋىپتەنەدى. پرەمەر-مينيستر تەرەزا مەيدىڭ ەۋروپالىق وداق قۇرامىنان شىعۋ تۋرالى شەشىمى وتكەن جىلدىڭ جازىنان بەرى جالعاسىپ كەلەدى. ەگەر Brexit ورىندالاتىن بولسا، بىرىككەن كورولدىك ەو-عا كوپ مولشەردە سالىق تولەپ، يرلانديامەن اراداعى شەكارا بايلانىسىن رەتتەۋگە مىندەتتى. نەگىزگى شارت بويىنشا، قوس تاراپ اي سوڭىنا دەيىن بىتىمگە كەلىپ، بريتانيا رەسمي تۇردە ەو-دان 29 ناۋرىزدا شىعۋى ءتيىس. الايدا، سوڭعى قاقتىعىستار مەن كەلىسپەۋشىلىكتەرگە قاراعاندا، Brexit جىرى ءالى ءبىرشاما ۋاقىتقا سوزىلاتىن ءتارىزدى.

"The Qazaq Times"