يندونەزيالىق ۇشاق تەڭىزگە قۇلادى

يندونەزيانىڭ Lion Air اتتى اۋە كومپانياسىنا تيەسىلى Boeing 737 جولاۋشىلار ۇشاعى اپاتقا ۇشىراعانى تۋرالى الەم اقپارات قۇرالدارى جازۋدا. اتالعان ۇشاق جاكارتا (دجاكارتا) اۋەجايىنان ۇشىپ شىعىپ، كوپ وتپەي تەڭىزگە قۇلاعان.  يندونەزيانىڭ ۇكىمەتى تاراتقان رەسمي مالىمەتتە، Boeing 737 ياۆا ارالىنىڭ باتىس جيەگىندە قۇلاعانى ايتىلادى.

Boeing 737 جاكارتادان بانكا ارالىنداعى پانكالپينانگ قالاسىنا بەت العان. اۋەگە كوتەرىلىپ 10 مينۋتتان كەيىن راداردان جوعالعان. يندونەزيالىق باق-تىڭ ايتۋىنشا، ۇشاقتا 178 جولاۋشى جانە 7 ەكيپاج مۇشەسى بولعان.

فوتو: BBC.

Lion Air اۆياكومپانياسى تۋرالى اقپاراتتاردى اقتارعانىمىزدا بىلگەنىمىز – اتالعان كومپانيا جەكە مەنشىك كومپانيا، سونداي-اق، يندونەزياداعى ەڭ ءىرى اۋە كومپانياسى بولىپ سانالادى. 120-دان استام باعىتقا ۇشاتىن 105 ۇشاعى بار. بۇدان بۇرىن اتالعان كومپانيادا اپاتتى جاعداي 2013 جىلى تىركەلگەن ەكەن. سول رەت  Boeing 737 ۇشاعى ۇشۋ جولىنان كوتەرىلە الماي قالعان، الايدا ەشكىم زارداپ شەكپەگەن.

ازىرگە، كەزەكتى اپاتتان زارداپ شەككەندەر تۋرالى انىق اقپارات جوق.

“The Qazaq Times”