فوتو: ۆۆس.

اقش پرەزيدەنتىنىڭ ۇلتتىق قاۋىپسىزدىك ماسەلەلەرى بويىنشا كەڭەسشىسى جون بولتوننىڭ ماسكەۋگە ساپارى اياقتالدى. رەسەي پرەزيدەنتى ۆلاديمير پۋتينمەن وتكەن كەزدەسۋدەن كەيىن بولتون جۋرناليستەرگە نە دەدى؟

ءباسپاسوز ءماسليحاتىنىڭ باستى تاقىرىبى اقش پرەزيدەنتى دونالد ترامپتىڭ رەسەيمەن اراداعى زىمىران كەلىسىمىنەن شىعاتىندىعى جونىندەگى مالىمدەمەسى بولدى. بولتون «روسسيا-1» تەلەارناسىنىڭ ءجۋرناليسى سەرگەي بريلوۆتىڭ: «كەلىسىم كۇشىن جويعاننان كەيىن جەرگىلىكتى حالىقتاردىڭ ومىرىنە قاۋىپ توندىرەتىن زىمىراندار ەۋروپاعا قايتىپ ورالا ما؟» دەگەن سۇراعىنا:

«شىن مانىندە ءدال قازىر ەۋروپادا رەسەيدىڭ زىمىراندارى تۇر. ەڭ قاۋىپتى دۇنيە اقش-تىڭ كەلىسىمنەن شىعۋى ەمەس، رەسەيدىڭ ەۋروپاداعى زىمىراندارى. اقش-تىڭ كەلىسىمنەن شىعۋىنىڭ باستى سەبەبى رەسەيدىڭ وزىنە جۇكتەلگەن مىندەتتەردى ورىنداماۋىندا. بىراق ماسكەۋ بۇنى مويىنداپ وتىرعان جوق. كەرسىنشە، اقش كەلىسىمنەن شىعۋ ارقىلى زاڭ بۇزىپ وتىر دەپ ەسەپتەيدى. ءبىز ولار مويىندامايتىن دۇنيەنى قالاي دالەلدەيمىز» - دەپ جاۋاپ بەردى.

بۇدان بولەك جون بولتون رەسەيگە سالىنىپ جاتقان اقش سانكتسيالارى، ءسۇريا، اۋعانستان، ۋكراينا جانە سولتۇستىك كورەيا ماسەلەلەرى جونىندەگى سۇراقتارعا جاۋاپ بەردى. ونىڭ سوزىنشە، رەسەيدىڭ ءسۇريا اۋماعىندا حيميالىق قارۋ قولدانعانى ءۇشىن اقش كونستيتۋتسياسى اق ءۇيدى ماسكەۋگە سانكتسيا سالۋعا مىندەتتەيدى. بىراق بۇل ۋاشينگتوننىڭ سوڭعى شەشىمى ەمەس.

ءسۇريا ماسەلەسىنە كەلگەندە بولتون: «ءسۇريادا الداعى ۋاقىتتا رەسەيمەن كەلىسە وتىرىپ جۇمىس ىستەۋگە ۋاعدالاستىق. يدليب ماسەلەسىنە قاتىستى كەلىسىم وتە ءتيىمدى بولدى. پرەزيدەنت ترامپ بۇل كەلىسىمنىڭ گۋماتيتارلىق تراگەديانىڭ الدىن العانىن باسا ايتتى. ازىرگە رەسەي، تۇركيا جانە ءسۇريانىڭ يدليبكە قاتىستى جاساعان كەلىسىمدەرى كەدەرگىلەرگە قاراماستان جۇمىس ىستەپ تۇر» - دەپ قىسقا عانا سويلەدى.

ءباسپاسوز ءماسليحاتى بارىسىندا بولتون پۋتينمەن كەزدەسۋدە رەسەي پرەزيدەنتىنىڭ ترامپپەن كەزدەسۋ ۇيىمداستىرۋعا بايلانىستى ۇسىنىس جاساعانىن ايتتى. ونىڭ سوزىنشە، الادعى ۋاقىتتا ترامپ پەن پۋتين پاريج قالاسىندا ەكىجاقتىق كەزدەسۋ وتكىزۋى مۇمكىن. كەينىننەن بولتوننىڭ بۇل ءسوزىن رەسەي پرەزيدەنتىنىڭ كومەكشىسى يۋري ۋشاكوۆ تا راستادى. ونىڭ ايتۋىنشا، پۋتين مەن ترامپ 11 قاراشا كۇنى فرانتسيا استاناسىندا ءبىرىنشى دۇنيەجۇزىلىك سوعىستىڭ اياقتالعاننىنا 100 جىل تولۋىنا وراي وتەتىن شارادان كەيىن كەزدەسەدى.

جالپى، جون بولتوننىڭ رەسەيگە ساپارى باق بەتتەرىندە قىزۋ تالقىلاندى. اتالمىش ساپارعا قاتىستى حالىقارالىق ساراپشىلاردىڭ پىكىرى ەكىگە ءبولىندى. ءبىرى «بولتوننىڭ ساپارى ۋاشينگتون مەن ماسكەۋ قارىم-قاتىناسىنداعى توڭدى جىبىتەدى» دەسە، ەندى ءبىرى «بۇل جولعى كەزدەسۋدىڭ بۇرىنعى كەزدەسۋلەردەن ەشقانداي ايىرماشىلىعى جوق» دەدى.

"The Qazaq Times"