وسىدان بىرنەشە كۇن بۇرىن رەسەي پرەزيدەنتى ۆلاديمير پۋتين وزبەكستانعا ساپارلاي باردى. ونى تاشكەنت تاعىنىڭ يەگەرى شاۆكات ميرزيەەۆ اسقان قوناقجايلىقپەن كۇتىپ الدى. باق بىتكەن پۋتين مەن ميرزيەەۆ مىنگەن كورتەجدەگى اۆتوكولىكتەردىڭ سانىنا، ءتۇسىن، ماركاسىن جارىسا جازدى. بىراق بۇگىن ءبىز رەسەي مەن وزبەكستان باسشىلارىنىڭ تاشكەنتتەگى باس قوسۋدا قانداي كەلىسىمدەرگە كەلگەنىنە قىسقاشا توقتالماقپىز.

ۇزاق جىلدىق ۇزىلىستەن كەيىن وتكەن وسى جولعى تاشكەنت باس قوسۋىندا ۆلاديمير پۋتين مەن شاۆكات ميرزيەەۆ 12 مەملەكەت ارالىق كەلىسىمگە قول قويدى. ونىڭ ىشىندە 27,1 ملرد دوللار ايماق ارالىق، 1,76 ميلليارد دوللار ساۋدا-ساتتىق، 25,3 ميلليارد دوللار ينۆەستيتسيالىق كەلىسىم قۇجاتتارى بار. بۇدان بولەك قوس تاراپ وزبەكستان اۋماعىندا ورتالىق ازياداعى ەڭ العاشقى اتوم ەلەكتر ستانتسياسىنىڭ قۇرىلىسىن باستاۋ جونىندە ۋاعدالاستى. كەلىسىم بويىنشا، اەس قۇرىلىسى رەسەيدىڭ «روساتوم» كومپانياسىنىڭ قاتىسۋىمەن جۇزەگە اسىرىلادى.

بۇدان بولەك كەزدەسۋ بارىسىندا رەسەي پرەزيدەنتى ءوزىنىڭ وزبەكستاندىق ارىپتەسىنە اسكەري كومەك قولىن سوزۋعا دايىن ەكەندىگىن ايتتى.

«ءبىز اسكەري-تەحنيكالىق ارىپتەستىك ورناتۋعا دايىنبىز. بۇعان سوڭعى ۇلگىدەگى اسكەري قارۋ-جاراقتاردى تاسىمالداۋ عانا ەمەس، اسكەري تەحنيكالاردى وزبەكستان اۋماعىندا بىرلەسىپ قۇراستىرۋدا كىرەدى» - دەپ مالىمدەدى ۆلاديمير پۋتين.

جالپى، پۋتين مەن ميرزيەەۆتىڭ بۇل جولعى كەزدەسۋى يسلام كارىموۆ جاساپ كەتكەن جۇيەنى قايتا قۇرۋ سياقتى اسەر قالدىردى. رەسەي پرەزيدەنتى كەزدەسۋ بارىسىندا «كارىموۆقا ارناپ ماسكەۋدە ەسكەرتكىش ورناتتىق» دەگەن ءبىر اۋىز سوزدەن باسقا ەكس-پرەزيدەنت جونىندە ءلام-ميم دەمەدى. سەبەبى كارىموۆ تۇسىندا رەسمي تاشكەنت ماسكەۋدىڭ ينۆەستيتسياسىنان باستاپ، اسكەري قارۋ-جاراقتارىنا دەيىنگى ارالىقتاعى دۇنيەلەرىنىڭ بارلىعىنان بويىن اۋلاق ۇستايتىن. ءوز كەزىندە كارىموۆ تىكەلەي كرەملدىڭ باقىلاۋىنداعى ۇجىمدىق قاۋىپسىزدىك تۋرالى كەلىسىم شارت ۇيىمىنىڭ قۇرامىنان دا شىعىپ كەتكەن.

"The Qazaq Times"