قۇراما شتاتتاردىڭ پرەزيدەنتى دونالد ترامپ اقش جەرگىلىكتى ۋاقىتىمەن جۇما كۇنى كەشتە مالىمدەمە جاساپ، ساۋد ارابياسىنا حاشوگگي ىسىنە بايلانىستى سانكتسيا سالاتىنىن، كونگرەسس سانكتسيا شارالارىن دايىنداۋعا كىرىسەتىنىن مالىمدەدى.

وسىدان ءسال عانا بۇرىن ساۋد ارابياسىنىڭ ۇكىمەتى مالىمدەمە جاساپ، وپپوزيتسيالىق جۋرناليست جامال حاشوگگي ستامبۋلداعى ساۋد ارابياسىنىڭ ەلشىلىگىندە قايتىس بولعانىن مويىنداعان. ءارى، حاشوگگيدى ەلشىلىكتە اتىس كەزىندە قازا تاپتى دەلىنگەن. الايدا، ەكى اپتا بويى ەر-رياد بيلىگى حاشوگگيدى ءوز ەلشىلىگىندە ءولتىرىلدى دەگەندى جوققا شىعارىپ كەلگەن ەدى.

ساۋد ارابياسى ۇكىمەتى جاريالاعان مالىمەتتە: «حاشوگگي كونسۋلدىقتا ءوزى كەزدەسكەن اداممەن اتىس بارىسىندا كوز جۇمعان، تەرگەۋ ءالى جالعاسۋدا، وسى ىسپەن قاتىسى بار دەلىنگەن 18 ساۋد ارابيالىق ازامات قولعا الىندى»، – دەلىنگەن.

ال، ساۋد ارابيانىڭ باق قۇرالدارى، كورول سالمان ءاس-ساۋدتىڭ ەكى بىردەي جوعارى لاۋازىمدى تۇلعانى قىزمەتتەن بوساتقانىن جاريالاۋدا.

پرەزيدەنت ترامپ وسىعان بايلانىستى جاساعان مالىمدەمەسىندە: «ساۋد ارابيا ءبىزدىڭ  ماڭىزدى وداقتاسىمىز. بىراق، مىنانداي وقيعانىڭ بولعانىن قابىلداۋعا شاراسىزبىن»، – دەدى. بىراق، ول ءسوزىنىڭ سوڭىندا: «ساۋد ارابياسىنىڭ حاشوگگي ءولىمى تۋرالى العاشقى مالىمدەمەسى سەنىمدى. ەر-رياد دۇرىس قادامعا بارعان»، – دەدى.

الايدا، كونگرەسستىڭ كەيبىر مۇشەلەرى ساۋد ارابياسىنىڭ العاشقى مالىمدەمەسىنىڭ سەنىمدىلىگىنە كۇمان كەلتىرگەن. ترامپتىڭ ساياسي جاقتاسى، رەسپۋبليكاشىلداردىڭ سەناتتاعى مۇشەسى ليندسي گرەم: «مەن كونسەرۆاتيۆتى تۇردە ساۋد ارابياسىنىڭ بۇل مالىمەتىنە كۇمان كەلتىرەمىن»، – دەدى.

وسىدان بۇرىن ترامپ: «تەرگەۋ ناتيجەسىندە ساۋد بيلىگى جۋرناليست حاشوگگيدى ولتىرگەنى راستالعان كۇندە دە، قۇراما شتات ساۋد ارابياسىنا قارۋ ساتۋدى توقتاتپاۋ كەرەك. سەبەبى، ءبىز قارۋ ساتپاساق، ەر-رياد قىتايدان نەمەسە رەسەيدەن قارۋ ساتىپ الاتىن بولادى»، – دەگەن بولاتىن.

“The Qazaq Times”