"ۇيرەنۋ لاگەرلەرى" تۋرالى تۇسىنىك بەرگەن شىنجاڭ باسشىسى اسىرە سىلتەۋشىلىك تۋرالى جۇمعان اۋزىن اشپادى

قىتايدىڭ رەسميلەرى شىنجاڭداعى «ۇيرەنۋ لاگەرلەرىنىڭ» ءىسى جانە ونىڭ ماقساتى تۋرالى العاش رەت اۋقىمدى تۇسىنىك بەردى. شىنجاڭ ۇيعىر اۆتونوميالى رەگيونىنداعى «ۇيرەنۋ لاگەرلەرىنە» ميلليونعا جۋىق مۇسىلمانداردىڭ قامالۋىنا بۇۇ تارابىنان الاڭداۋشىلىق ءبىلدىرىلىپ، قىتاي ۇكىمەتىن سىنعا العان بولاتىن. ءارى، قىتايدان رەسمي تۇردە تۇسىنىك بەرۋدى تالاپ ەتكەن ەدى.

بۇعان دەيىن الەمنىڭ كوپتەگەن ەلىندەگى اقپارات قۇرالدارىندا شىنجاڭداعى «ۇيرەنۋ لاگەرلەرى» جازىقتى-جازىقسىز ءجۇز مىڭداعان ادامداردى قاماپ وتىرعانى، ولاردىڭ ءتۇرلى قيناۋ كورىپ، قۇقىقتارى تاپتالىپ جاتقانى تۋرالى حابارلار تاراعان بولاتىن. الايدا، قىتايدىڭ «شينحۋا» رەسمي اقپارات اگەنتتىگى شىنجاڭ اۆتونوميالى رەگيونىنىڭ توراعاسى شۇكىرات زاكيرمەن بولعان سۇحباتتى تاراتقان. وندا شىنجاڭ باسشىسى بۇل لاگەرلەردى اقىسىز كاسىپتىك ۇيرەتۋ ورىندارى رەتىندە كورسەتكەن.

شۇكىرات زاكير سوزىندە، شىنجاڭ بيلىگى «كاسىپتىك ءبىلىم ۇيرەتۋ ورىندارىن» اشۋ ارقىلى تەرروريزمدى تۇبەگەيلى جويۋعا تىرىسىپ جاتقانىن ايتادى. ول جانە  بۇنداعى ادامداردىڭ تاماعى، كيىمى، جاتار ورىنى تولىقتاي ۇكىمەت جاعىنان قامتاماسىز ەتىلگەنىن، ءتىپتى،  جاتاقحانالارىندا تەلەديدار، كونديتسيونەر جانە ىستى0 سۋ دا بار ەكەنىن، بۇلاردىڭ ءبارى ۇكىمەتتىڭ قامقورلىعى رەتىندە كورسەتەدى.

دەگەنمەن، شۇكىرات زاكىر سۇحباتىندا «ۇيرەنۋ لاگەرلەرىنىڭ» جۇيەسى، ولاردىڭ ناقتى قانداي جۇمىس ىستەپ وتىرعانىن اشىپ ايتپايدى. تەك، بۇل لاگەرلەردى «تەرروريزمگە قارسى كۇرەس ءۇشىن، ەكستورميزمگە قاتىسى بار ادامداردىڭ سانا سەزىمدەرىن وزگەرتۋ جۇمىستارىن، ولاردىڭ ساناسىندا ەكسترەميزمگە قارسىلىقتى وياتۋ قىزمەتتەرى جاسالىپ جاتقانىن ايتادى.

قىتاي ۇكىمەتىنىڭ شىنجاڭدا جاساپ جاتقان شارالارىنا، ورتا شىعىس پەن شەكارالاس اۋعانستانداعى جاعدايدىڭ دا وزىندىك سەبەبى بولعانىنا كوز جۇمبايمىز. بىراق، شىنجاڭنىڭ رەسمي وكىلى ونداعى لاگەرلەر تۋرالى ءسوز ەتكەندە جەرگىلىكتى ورىندارداعى اسىرە سىلتەۋشىلىكتەر تۋرالى جۇمعان اۋزىن اشپاعان. ونداعى ازاماتتاردىڭ قۇقىعى، ءدىني بوستاندىعىنىڭ تاپتالعاندىعى تۋرالى، ءتىپتى قىتايدىڭ ءوز كونستيتۋتسياسىنا قايشى زاڭ-ەرەجەلەرمەن قىسىمعا ۇشىراپ جاتقانى تۋرالى ەشقانداي پىكىر بىلدىرمەگەن.

“The Qazaq times”