ينگۋشەتيا مەن شەشەنستان اراسىنداعى جاڭا شەكارانى بەلگىلەۋگە قاتىستى كەزەكتەن تىس داۋىس بەرۋ وتكەن جوق. سەبەبى، ينگۋشەتيا دەپۋتاتتارى پارلامەنت وتىرىسىنا قاتىسپاعان.

وتكەن اپتادا قوس ەلدىڭ باسشىلارى رامزان قادىروۆ پەن يۋنۋس-بەك ەۆكۋروۆ ەكى سۋبەكت اراسىندا اكىمشىلىك شەكارا ورناتۋ تۋرالى ورتاق شەشىمگە كەلگەن بولاتىن. داۋىس بەرۋ بۇگىن وتكىزىۋى ءتيىس ەدى. الايدا، مەملەكەت ءۇشىن ماڭىزدى كەزدەسۋگە تەك ون ەكى دەپۋتات كەلگەن. كەلىسىمدى قۇپتاۋ ءۇشىن كەم دەگەندە جيىرما شاقتى دەپۋتات قول قويۋى كەرەك.

ەسكە سالا كەتەيىك، ينگۋشەتيا پارلامەنتى شەشەنستانمەن شەكارانى رەتتەۋ تۋرالى كەلىسىمدى بەكىتكەن سوڭ، جەرگىلىكتى تۇرعىندار ەرەۋىلگە شىقتى. نارازى توپ ينگۋشەتيا استاناسى ماگاس قالاسىندا جولدى جاۋىپ، بيلىكتەن شەكارا ماسەلەسىنە قاتىستى شەشىمدى وزگەرتۋىن تالاپ ەتتى. ەكى ەلدىڭ شەشىمىنە جۇزدەگەن حالىق قانا ەمەس، كونستيتۋتسيالىق سوت تا قارسىلىق بىلدىرگەن. وسى رەتتە ايۋپ گاگيەۆ ينتەرفاكسكە بەرگەن سۇحباتىندا: «ينگۋشەتيا كونستيتۋتسياسىنىڭ 111-بابىنا سايكەس شەكارالاردى بەلگىلەۋ مەن وزگەرتۋ جانە اكىمشىلىك-اۋماقتىق قۇرىلىستىڭ باسقا دا ماسەلەلەرى فەدەرالدىق زاڭدارعا سايكەس جانە حالىقتىڭ پىكىرىن ەسكەرە وتىرىپ شەشىلەتىنىن» – ايتىپ، حالىق پىكىرىن قولدادى. سونداي-اق ينگۋشەتيانىڭ ەكس-پرەزيدەنتى رۋسلان اۋشەۆ رەسپۋبليكا باسشىلىعىنىڭ شەشەنستانمەن كەلىسىم جاساسۋدا قاتەلىك جىبەرگەنىن مالىمدەدى.

"The Qazaq Times"