تۇركىمەنستاننىڭ سولتۇستىك اۋداندارى تۇزدى داۋىل استىندا قالدى.

جەرگىلىكتى باق وكىلدەرىنىڭ مالىمەتىنشە، وتكەن جۇمادا باستالعان اڭىزاق جەل ارال تەڭىزىندەگى تۇزدى كوتەرىپ، سالدارىنان داشوعىز، لەباپ وبلىستارىنداعى تۇركىمەنباسى، رۋحىبەلەت جانە اقدەپە اۋداندارى تۇزدى داۋىلدىڭ استىندا قالعان.

بۇعان دەيىن مامىر ايىڭ 26-27 كۇندەرى ارال تەڭىزى اۋماعىندا باستالعان جەل تۇركىمەنستاننىڭ داشوعىز جانە لەباپ وبلىستارىن، وزبەكستاننىڭ حورەزم وبلىسى مەن قاراقالپاقستاندى تۇزبەن ورعان. ول كەزدە جەل سەكۋندىنا 20 مەتر جىلدامدىقپەن سوققان.

ارال تەڭىزىندە بولعان ەكولوگيالىق اپات ءبىرىنشى كەزەكتە تۇركىمەنستاننىڭ داشوعىز وبلىسىنا زيان كەلتىرۋدە. قازىرگى تاڭدا جەرگىلىكتى حالىق اۋىزسۋ تاپشىلىعى مەن اۋىل شارۋاشىلىق ونىمدەرىنەن تارشىلىق كورىپ وتىر. سەبەبى ارال اۋماعىنان كوتەرىلگەن تۇزدى داۋىل داشوعىز حالقىنىڭ تىنىسىن تارىلتىپ، وبلىستاعى سۋ ارنالارىن پايدالانۋعا جارامسىز ەتۋدە. 2017 جىلدىڭ قاراشا ايىندا تۇكىمەنستان بيلىگى ارالدان كەلەتىن تۇزدى داۋىلدى توقتاتۋ ماقساتىندا سارىقامىس وزەنىنىڭ ماڭايىنا ورماندى القاپ وسىرەتىندىگىن مالىمدەگەن. بىراق ازىرگە بۇل باستاما تەك قاعاز جۇزىندە قالعان.

"The Qazaq Times"