رەسەي ءسىم س.لاۆروۆ. فوتو: tulactive.ru

رەسەي سىرتقى ىستەر ءمينيسترى سەرگەي لاۆروۆ رەسەيلىكتەردىڭ نيدەرلاندىعا بارعان ساپارىندا حيميالىق قارۋدى پايدالانۋعا تىيىم سالاتىن ۇيىمنىڭ مالىمەتتەرى ۇرلانباعان دەپ مالىمدەدى.

يتاليانىڭ سىرتقى ىستەر مينيسترىمەن بىرگە وتكەن ءباسپاسوز كونفەرەنتسياسىندا: «وسى جىلدىڭ ءساۋىر ايىندا رەسەيلىك مامانداردىڭ گااگاعا ساپارىندا قۇپيا ەشتەڭە بولعان جوق. ولار قوناق ۇيگە، اۋەجايعا جانە ءبىزدىڭ ەلشىلىگىمىزگە بارعان كەزدە دە جاسىرىن ارەكەت جاساعان جوق»، – دەدى لاۆروۆ.

لاۆروۆتىڭ ايتۋىنشا، رەسەي ازاماتتارىن ەش نەگىزسىز تۇتقىنعا الۋ تۇسىنبەۋشىلىك تۋعىزادى. «گوللانديالىق ءباسپاسوز بەتتەرىندە بۇل ادامداردىڭ كيبەرشابۋىلمەن اينالىسقانى تۋرالى اقپارات جاريالاندى. ءبىزدىڭ تاراپ وسى وقيعانىڭ باسىن اشپاق بولىپ، نيدەرلاندى ەلشىسىن سىرتقى ىستەر مينيسترلىگىنە شاقىرىپ، ەگجەي-تەگجەيلى سۇرادىق. بىراق ولار ناقتى دەرەككوزدەرىن كورسەتە المادى»، – دەيدى.

گااگاداعى تەرگەۋ

سكريپال وقيعاسىنان كەيىن رەسەيدىڭ ەكونوميكالىق جاعدايىنا وراسان زور نۇقسان كەلۋدە. اقش پەن ۇلىبريتانيا جولداعان تولاسسىز سانكتسيالار رەسەيلىك نارىقتى قوس بۇيىردەن قىسىپ تۇر. بۇل قاتارعا گوللانديالىق تەرگەۋ دە قوسىلدى.

وتكەن اپتادا نيدەرلاندىنىڭ قورعانىس مينيسترلىگى گااگاداعى حيميالىق قارۋعا تىيىم سالۋ جونىندەگى ۇيىمنىڭ شتاب-پاتەرىنىڭ كومپيۋتەرلىك جەلىسىن بۇزعىسى كەلگەن ءتورت رەسەيلىك قىزمەتكەردىڭ ەلدەن قۋىلعانىن حابارلاعان بولاتىن. وسىدان كەيىن حقتۇ سۇرياداعى حيميالىق شابۋىلداردى جانە بارلاۋ باسقارماسىنىڭ بۇرىنعى قىزمەتكەرى سەرگەي سكريپال مەن ونىڭ قىزى يۋليانىڭ سولسبەريدەگى ۋلانۋىنا قاتىستى قوزعالعان ءىستى تەكسەرۋگە قاتىستى. زەرتتەۋدەن سوڭ گوللاندتىق قورعانىس مينيسترلىگى سكريپالدى ۋلاۋعا جىبەرىلگەن ادامداردىڭ اتتارىن اتادى. گوللانديالىق اسكەري بارلاۋدىڭ مالىمەتتەرى بويىنشا، ءتورت كۇدىكتى رەسەي باس شتابىنىڭ ارنايى قىزمەتكەرلەرى. وسى كۇدىكتىلەردىڭ ءبىرى دونباسستا MH-17 رەيسىنىڭ اپاتقا ۇشىراۋى تۋرالى فايلداردى حاكەرلىك جولمەن ۇرلاعان.

ءباسپاسوز ءماسليحاتى بارىسىندا ۇلىبريتانيا وكىلى اتالعان اسكەري ءبولىمنىڭ قىزمەتكەرلەرى وسى جىلدىڭ ناۋرىز ايىندا سەرگەي سكريپال ۋلانعاننان كەيىن بريتان سىرتقى ىستەر مينيسترلىگىنىڭ جەلىلەرىنە شابۋىل جاساعانىن ايتتى. حالىقارالىق زەرتتەۋلەر مەن دەرەكتەرگە قاراماستان، وزىنە تاعىلعان ايىپتاردان ادەتتەگىدەي جالتارىپ وتىرعان رەسەي تاراپىن گوللانديالىق ءباسپاسوز «ناعىز شپيوناج ۇيىمداستىرۋشىلار» – دەپ ايىپتادى. ال بريتانيا باسىلىمدارى «ەندى رەسەيدىڭ كۇلۋگە دە مۇرشاسى بولمايدى» – دەگەن.

"The Qazaq Times"