جەكسەنبىدەگى پومپەو مەن كيم اراسىنداعى كەزدەسۋ. فوتو: VOA,.

جەكسەنبى كۇنى اقش مەملەكەتتىك حاتشىسى پومپەو پيوڭياڭ (پحەنيان) قالاسىندا سولتۇستىك كورەيا باسشىسى كيم جوڭ ۋنمەن (كيم چەن ىن / Kim Jong Un) كەلىسسوز وتكىزدى. پومپەو كەزدەسۋدەن كەيىنگى رەسمي مالىمدەمەسىندە كحدر باسشىسىنىڭ  حالىقارالىق باقىلاۋشىلار توبىنىڭ ەلىنە كەلىپ، يادرولىق قارۋ مەن سىناقتار تۋرالى تەكسەرۋىن قابىلداۋعا دايىن ەكەنىن مالىمدەدى. حالىقارالىق ينسپەكتورلاردىڭ باقىلاۋىن جۇزەگە اسىرۋ بۇعان دەيىن سولتۇستىك كورەيامەن ديالوگ وتكىزۋ بارىسىنداعى ەڭ قيىن ماسەلەنىڭ ءبىرى بولىپ كەلگەن ەدى.

اقش مەملەكەتتىك حاتشىسىنىڭ ايتۋىنشا، تاراپتار ناقتى كەلىسىمدەردى جاساسىپ بولعاننان كەيىن، حالىقارالىق ينسپەكتورلار توبى سولتۇستىك كورەياداعى يادرولىق جانە بالليستيكالىق زىمىران سىناق الاڭدارىنا بارا الادى.

پومپەو جانە اقش پەن كحدر باسشىلارىنىڭ ەكىنشى ءسامميتى دە كوپ ۇزاماي جۇزەگە اساتىنىن ايتتى. ەستەرىڭىزدە بولسا، قىركۇيەك ايىنىڭ باس شەنىندە كيم جوڭ ۋن ترامپقا حات جولداپ، ەكىنشى رەت كەزدەسۋ تۋرالى ۇسىنىس ەتكەن ەدى. ال ولاردىڭ العاشقى كەزدەسۋى ماۋسىم ايىندا سينگاپۋردا بولعان ەدى.

سولتۇستىك كورەيانىڭ رەسمي اقپارات اگەنتتىگى بۇگىن تاڭەرتەڭ تاراتقان حابارلارىندا كحدر باسشىسى مەن اقش مەملەكەتتىك حاتشىسى اراسىنداعى كەلىسسوزدى «ءتيىمدى ءارى جوعارى دەڭگەيدەگى كەلىسسوز بولدى»  دەپ باعالاعان. ءتىپتى سولتۇستىك كورەيانىڭ رەسمي اقپارات قۇرالدارى وسىعان دەيىنگى قۇراما شتاتپەن بولعان كەلىسسوزدەر مەن كەزدەسۋلەر تۋرالى مۇنداي جىلى لەبىز تانىتپاعان بولاتىن.

سونىمەن، وسى مالىمەتتەرمەن-اق، پومپەونىڭ سولتۇستىك كورەياعا ءتورتىنشى رەتكى ساپارى اسا تابىستى دەڭگەيدە اياقتالدى دەۋگە بولادى. الايدا، اقش ءوزىنىڭ دەگەنىنە تولىقتاي جەتۋ ءۇشىن ءالى دە كوپتەگەن كەلىسىمدەر جۇرگىزىلىپ، قىرۋار جۇمىستار اتقارىلۋى كەرەك.

ايتا كەتەيىك، پومپەو بۇگىن بەيجىڭدە قىتاي ۇكىمەتىنىڭ جوعارى لاۋازىمدىلارىمەن كەزدەسەدى. كەزدەسۋدە ەكى ەل اراسىنداعى شيەلەنىستى جەڭىلدەتۋدىڭ جولدارى قاراستىرىلادى دەپ كۇتىلۋدە.

“The Qazaq Times”