Jeksenbidegi Pompeo men Kim arasındağı kezdesu. Foto: VOA,.

Jeksenbi küni AQŞ memlekettik hatşısı Pompeo Pioñyañ (Phen'yan) qalasında Soltüstik Koreya basşısı Kim Joñ Unmen (Kim Çen In / Kim Jong Un) kelissöz ötkizdi. Pompeo kezdesuden keyingi resmi mälimdemesinde KHDR basşısınıñ  halıqaralıq baqılauşılar tobınıñ eline kelip, yadrolıq qaru men sınaqtar turalı tekseruin qabıldauğa dayın ekenin mälimdedi. Halıqaralıq inspektorlardıñ baqılauın jüzege asıru bwğan deyin Soltüstik Koreyamen dialog ötkizu barısındağı eñ qiın mäseleniñ biri bolıp kelgen edi.

AQŞ memlekettik hatşısınıñ aytuınşa, taraptar naqtı kelisimderdi jasasıp bolğannan keyin, halıqaralıq inspektorlar tobı Soltüstik Koreyadağı yadrolıq jäne ballistikalıq zımıran sınaq alañdarına bara aladı.

Pompeo jäne AQŞ pen KHDR basşılarınıñ ekinşi sammiti de köp wzamay jüzege asatının ayttı. Esteriñizde bolsa, qırküyek ayınıñ bas şeninde Kim Joñ Un Trampqa hat joldap, ekinşi ret kezdesu turalı wsınıs etken edi. Al olardıñ alğaşqı kezdesui mausım ayında Singapurda bolğan edi.

Soltüstik Koreyanıñ resmi aqparat agenttigi bügin tañerteñ taratqan habarlarında KHDR basşısı men AQŞ memlekettik hatşısı arasındağı kelissözdi «tiimdi äri joğarı deñgeydegi kelissöz boldı»  dep bağalağan. Tipti Soltüstik Koreyanıñ resmi aqparat qwraldarı osığan deyingi Qwrama Ştatpen bolğan kelissözder men kezdesuler turalı mwnday jılı lebiz tanıtpağan bolatın.

Sonımen, osı mälimettermen-aq, Pompeonıñ Soltüstik Koreyağa törtinşi retki saparı asa tabıstı deñgeyde ayaqtaldı deuge boladı. Alayda, AQŞ öziniñ degenine tolıqtay jetu üşin äli de köptegen kelisimder jürgizilip, qıruar jwmıstar atqarıluı kerek.

Ayta keteyik, Pompeo bügin Beyjiñde Qıtay ükimetiniñ joğarı lauazımdılarımen kezdesedi. Kezdesude eki el arasındağı şielenisti jeñildetudiñ joldarı qarastırıladı dep kütilude.

“The Qazaq Times”