اقش ۆيتسە-پرەزيدەنتى قىتايدىڭ ىشكى-سىرتقى ساياساتىن قاتاڭ ايىپتادى

كەشە كەشتە، اقش-تىڭ جەرگىلىكتى ۋاقىتىمەن 4 قازان كۇنى تۇستەن بۇرىن ۆيتسە-پرەزيدەنت مايك پەنس ترامپ ۇكىمەتىنىڭ ەكى جىلدان بەرگى قىتايعا باعىتتالعان ساياساتى جونىندەگى ەڭ كولەمدى باياندامانى جاسادى.

گۋدزون ينستيتۋتىندا جاسالعان بايانداماسىندا مايك پەنس قىتايدىڭ وڭتۇستىك قىتاي تەڭىزىندەگى ميليتاريزاتسياسىن قاتاڭ سىنعا الىپ، تايۆاننىڭ سىرتقى ساۋدا جانە ينۆەستيتسيا ساياساتىنا توسقاۋىل جاساپ، ساياسي قىسىم كورسەتىپ وتىر دەپ ايىپتادى. بۇدان تىس ەل ازاماتتارىنا قىسىم ءتۇسىرىپ، ءجۇرىس-تۇرىسىن باقىلاۋدى كۇشەيتىپ، قۇقىقتارىنا قول سۇعىپ وتىرعانىن جانە اقش-تىڭ دەموكراتيالىق جۇيەسىنە ارالاسىپ وتىرعانىنا قاتاڭ نارازىلىق تانىتتى.

ول سوزىندە اقش-تىڭ بارلاۋ اگەنتتىكتەرىنىڭ تەكسەرۋ ناتيجەسىنە سايكەس قىتايدىڭ اقش-تاعى دەموكراتيالىق جۇيەگە، سايلاۋعا ارالاسۋ ارەكەتتەرىن دالەلدەيتىن ناقتى قۇجاتتاردىڭ بار ەكەنىن اتاپ ءوتتى.

اقش ۆيتسە-پرەزيدەنتىنىڭ مالىمدەمەسىنەن كەيىن، بەيجىڭ تارابى بۇگىن تاڭەرتەڭ قارسى مالىمدەمە جاساپ، ۋاشينگتوننىڭ سىنىن جوققا شىعاردى. قىتاي ءسىم-ءنىڭ رەسمي وكىلى حۋا ءچۇنيىڭ ارنايى ءباسپاسوز جيىنىندا مايك پەنكستىڭ قىتايدىڭ ىشكى جانە سىرتقى ساياساتتارى تۋرالى ايتقان بارلىق ايىپتاۋلارى نەگىزسىز دەپ كورسەتتى.

قىتاي ءسىم وكىلى حۋا ءچۇنيىڭ. فوتو: VOA.

مايك پەنستىڭ وڭتۇستىك قىتاي تەڭىزىندەگى قىتايدىڭ اسكەري ارەكەتتەرى تۋرالى ايىپتاۋىنا جاۋاپ رەتىندە، حۋا ءچۇنيىڭ: «قىتاي ءاردايىم جاھاندىق بەيبىتشىلىك پەن دامۋدى جانە حالىقارالىق قۇقىقتاردى قورعاۋشى ەل»، – دەگەن سوزدەرمەن جاۋاپ بەردى.

اقش ۆيتسە-پرەزيدەنتى ءسوزىنىڭ سوڭىندا: «قۇراما شتات بەيجىڭمەن قاۋىپسىزدىك جانە دامۋدى قامتاماسىز ەتۋ ءۇشىن كونسترۋكتيۆتى قارىم-قاتىناس ورناتۋعا ۇمىتكەر. بىراق، قىتايمەن قارىم-قاتىناسىمىز ادىلدىككە نەگىزدەلگەن، ءبىر-ءبىرىنىڭ ەگەمەندىگىنە، قۇندىلىقتارىنا دەگەن ءوزارا قۇرمەت بولماسا ءبىز بۇل قادامدى جاساي المايمىز»، – دەدى.

قازىر اقش پەن قىتاي قاتىناسى بارعان سايىن شيەلەنىسە تۇسۋدە. مايك پەنستىڭ مالىمەدەمسىنەن بۇرىن اقش مەملەكەتتىك حاتشىسى پومپەونىڭ شىعىس ازيا ەلدەرىنىڭ استانالارىنا بارىپ، ۇكىمەت باسشىلارىمەن وڭىرلىك جانە جاھاندىق پروبلەمالاردى تالقىلايتىنى حابارلانعان بولاتىن. بۇگىن تاڭەرتەڭگى مالىمدەمەدە قىتاي ءسىم وكىلى پومپەونىڭ بۇل رەتكى ساپارى تۋرالى دا ايتىپ ءوتتى.

ساراپشىلاردىڭ پىكىرىنشە، پومپەو ساپارى بارىسىندا قوس تاراپتاردا شيەلەنىستى جەڭىلدەتۋگە تىرىساتىن بولادى. پومپەو ساپارى اقش-قىتاي اراسىنداعى شيەلەنىستى  شەشۋ جولدارىن قاراستىرۋدىڭ ءبىر رەتكى ورايى بولماق. الايدا، پومپەونىڭ بەيجىڭ ساپارى ەكى ەل اراسىنداعى بارلىق ماسەلەلەردى تۇبەگەيلى جاقسارتا المايدى دەپ قارايدى.

“The Qazaq Times”