ينگۋشەتيا حالقى شەشەنستانمەن شەكارانى رەتتەۋگە قارسى

ينگۋشەتيا پارلامەنتى شەشەنستانمەن شەكارانى رەتتەۋ تۋرالى كەلىسىمدى بەكىتتى. الايدا بۇل شەشىمگە قارسىلىق بىلدىرگەن جەرگىلىكتى تۇرعىندار ەرەۋىلگە شىقتى.

نارازى توپ ينگۋشەتيا استاناسى ماگاس قالاسىندا جولدى جاۋىپ، بيلىكتەن شەكارا ماسەلەسىنە قاتىستى شەشىمدى وزگەرتۋىن تالاپ ەتتى. جاپپاي ەرەۋىل سالدارىنان كولىك قوزعالىسى قيىنداپ، ايماقتاردا عالامتور وشىرىلگەن. ەكى ەلدىڭ شەشىمىنە جۇزدەگەن حالىق قانا ەمەس، كونستيتۋتسيالىق سوت تا قارسىلىق بىلدىرگەن. وسى رەتتە ايۋپ گاگيەۆ ينتەرفاكسكە بەرگەن سۇحباتىندا: «ينگۋشەتيا كونستيتۋتسياسىنىڭ 111-بابىنا سايكەس شەكارالاردى بەلگىلەۋ مەن وزگەرتۋ جانە اكىمشىلىك-اۋماقتىق قۇرىلىستىڭ باسقا دا ماسەلەلەرى فەدەرالدىق زاڭدارعا سايكەس جانە حالىقتىڭ پىكىرىن ەسكەرە وتىرىپ شەشىلەدى» – دەيدى.

ايتا كەتەيىك، وتكەن اپتادا قوس ەلدىڭ باسشىلارى رامزان قادىروۆ پەن يۋنۋس-بەك ەۆكۋروۆ ەكى سۋبەكت اراسىندا اكىمشىلىك شەكارا ورناتۋ تۋرالى ورتاق شەشىمگە كەلگەن بولاتىن. كەلىسىمدى راتيفيكاتسيالاۋ ءۇشىن 35 دەپۋتاتتىڭ 17-ءسى قولداپ داۋىس بەرگەن.

"The Qazaq Times"