پومپەونىڭ ماۋسىمداعى بەيجىڭ ساپارى. فوتو: VOA.

اقش مەملەكەتتىك دەپارتامەنتى رەسمي مالىمدەمە جاساپ، مەملەكەتتىك حاتشى پومپەو 6-8 قازان كۇندەرىندە توكيو، پيوڭياڭ (پحەنيان), سەۋل جانە بەيجىڭ قاتارلى جاپونيا، سولتۇستىك كورەيا، وڭتۇستىك كورەيا جانە قىتاي ورتالىق قالالارىندا رەسمي ساپاردا بولاتىنىن حابارلادى.

مالىمدەمەدە ايتىلۋىنشا، پومپەو كەزەكتى شىعىس ازيا ەلدەرىندەگى ساپارىندا سولتۇستىك كورەيانىڭ تۇپكىلىكتى جانە تولىق تەكسەرىلگەن تۇردە يادرولىق قارۋدان باس تارتۋ ماسەلەسىن باستى نازارعا ۇستاماق. بۇعان قوسا قۇراما شتاتتىڭ ايماقتاعى وداقتاستارى مەن ماڭىزدى سەرىكتەستەرىمەن ۇزاق مەرزىمدى قارىم-قاتىناس ماسەلەلەرى دە قولعا الىنباق.

ساپاردىڭ كۇن تارتىبىنە سايكەس، 6-7 قازان كۇندەرى پومپەو توكيودا جاپونيانىڭ باس ءۋازىرى شينزو ابە جانە ءسىم باسشىسى تارومەن كەزدەسۋ ۇيىمداستىرادى.

7 قازان كۇنى اقش مەملەكەتتىك حاتشىسى پيوڭياڭ قالاسىندا سولتۇستىك كورەيا باسشىسى كيم جوڭ ۋنمەن كەزدەسەدى.

7-8 قازان كۇندەرى سەۋلدە وڭتۇستىك كورەيا پرەزيدەنتى ءمۇن جاين مەن سىرتقى ىستەر ءمينيسترى كان گيونحۆامەن كەزدەسۋدە بولادى.

8 قازان كۇنى ساپارىنىڭ سوڭعى بەكەتىندە اقش مەملەكەتتىك حاتشىسى قىتاي ورتالىق قالاسىندا ايماقتىق جانە جاھاندىق ماسەلەلەردى تالقىلاۋ ءۇشىن قىتايلىق ارىپتەستەرىمەن كەزدەسەدى.

مالىمدەمەدە، پومپەونىڭ جاپونيا، وڭتۇستىك جانە سولتۇستىك كورەيا باسشىلارىمەن كەزدەسەتىنى انىق ايتىلعان. الايدا، قىتاي باسشىسى شي جينپيڭمەن كەزدەسەتىنى تۋرالى مالىمەت بەرىلمەگەن.

الايدا، پومپەو وسىدان بۇرىن 14 ماۋسىم كۇنى بەيجىڭگە جاساعان رەسمي ساپارى كەزىندە اقش-تىڭ قىتايداعى باس ەلشىسى براندستپەن بىرگە قىتاي توراعاسى شي جينپيڭ، مەملەكەتتىك كەڭەستىڭ توراعاسى ياڭ جيەچى جانە سىرتقى ىستەر ءمينيسترى ۋاڭ يمەن كەزدەسكەن بولاتىن. ماۋسىم ايىنداعى كەزدەسۋدە تاراپتار كحدر يادرولىق ماسەلەسى، ساۋدا جانە وڭتۇستىك قىتاي تەڭىزىنىڭ ميليتاريزاتسياسى سياقتى تاقىرىپتاردى تالقىلادى.

ال اقش قورعانىس ءمينيسترى جەيمس مەتتيس سوڭعى رەت 27 ماۋسىم كۇنى بەيجىڭ ساپارىندا بولعان. ول قىتاي باسشىسى شي جينپيڭ جانە قىتاي قورعانىس ءمينيسترى ۆەي فىڭحىمەن كەزدەسىپ، وڭتۇستىك قىتاي تەڭىزىنىڭ ميليتاريزاتسياسىن جانە ەركىن ناۆيگاتسيا ماسەلەلەرىن اتاپ وتكەن بولاتىن. دەگەنمەن، وسىدان كەيىن قىتاي مەن اقش-تىڭ وڭتۇستىك قىتاي تەڭىزى جانە ءۇندى-تىنىق مۇحيتىنداعى قايشىلىعى ارتا تۇسكەن بولاتىن. بۇل قايشىلىق قازىر ءتىپتى دە ۇلعايىپ، ەكى ەل اراسىنداعى ەڭ ۇلكەن ماسەلەنىڭ بىرىنە اينالىپ وتىر.

پومپەونىڭ كەزەكتى بەيجىڭ ساپارى اقش پەن قىتاي قاتىناسىنا قانداي ىقپال جاسايتىنى تۋرالى تاپ باسىپ ايتۋ قيىن. دەگەنمەن، ەكى ەل ورتاداعى ساۋدا جانە قورعانىس سالاسىنداعى ماسەلەلەردى شەشۋگە تالپىنىس جاسايتىنى ايقىن.

“The Qazaq Times”