وزبەكستاننىڭ ەكس-پرەزيدەنتى يسلام كارىموۆتىڭ قىزى گۇلنارا كارىموۆا.

وزبەكستان باس پروكۋراتۋراسى: «گۇلنارا كارىموۆا سوت شەشىمىنە سايكەس جازاسىن وتەۋدە» – دەپ مالىمدەدى.

وزبەكستان باس پروكۋراتۋراسى ريا نوۆوستي اقپارات اگەنتتىگىنىڭ ساۋالىنا جىبەرگەن جاۋابىندا «گۇلنارا كارىموۆا جازاسىن سوت شىعارعان شەشىمگە سايكەس وتەۋدە» - دەپ مالىمدەگەن.

قىركۇيەك ايىنىڭ 29-ى كۇنى گۇلنارا كارىموۆانىڭ قىزى يمان كارىموۆا Instagram الەۋمەتتىك جەلىسىندەگى پاراقشاسىنا ستامبۇلدان لوندونعا باراتىن ۇشاق بيلەتىنىڭ فوتوسىن سالىپ، «انام (گۇلنارا كارىموۆا - رەد) ەندى ۇيدە» - دەپ جازعان. بۇعان دەيىن وزبەكستان باس پروكۋراتۋراسى يمان كارىموۆانىڭ ەلدەن ەشقانداي كەدەرگىسىز شىعىپ كەتكەندىگىن راستاعان.

گۇلنارا كارىموۆانىڭ ۇستىنەن قىلمىستىق ءىس 2015 جىلى قوزعالعان. ءدال وسى جىلى تاشكەنت قالالىق سوتى ونى «اسا ءىرى كولەمدە قارجى جىمقىرۋ»، «بوپسالاۋ»، «سالىقتان جالتارۋ» ايىپتارى بويىنشا كىنالى دەپ تانىپ، بەس جىلعا باس بوستاندىعىنان ايىرعان.

2017 جىلدىڭ شىلدە ايىندا وزبەكستان باس پروكۋراتۋراسى گۇلنارا كارىموۆانىڭ ۇستىنەن تاعى بىرنەشە قىلمىس بويىنشا ءىس قوزعالعاندىعىن مالىمدەدى. جاڭادان تاعىلعان ايىپ بويىنشا، ەكس-پرەزيدەنت قىزى وزبەكستانعا 2 ملرد دوللار كولەمىندە زيان كەلتىرگەن. وزبەكستان رەسمي ورگاندارىنىڭ بۇل مالىمدەمەسىنەن كەيىن گۇلنارا كارىموۆانىڭ الەمنىڭ 12 ەلىندەگى بانك شوتتارى مەن جىلجىمايتىن مۇلىكتەرى بۇعاتتالعان.

"The Qazaq Times"