تەڭىزدەگى داۋ-شار اقش پەن قىتايدىڭ عاسىرلىق قايشىلىعىنا اينالۋى مۇمكىن

سوڭعى ۋاقىتتاردا اقش-قىتاي قاتىناسى ساۋدا-ساتتىق داۋلارىنا جانە تەڭىز ايدىندارىنىڭ ەگەمەندىگى، اسكەري قاۋىپسىزدىك ماسەلەلەرىندەگى قايشىلىقتارعا بايلانىستى بارعان سايىن سالقىنداي تۇسۋدە. ەكى ەل اراسىنداعى قاراما-قايشىلىق سوڭعى بىرنەشە اپتادا ءتىپتى دە انىق كورىنە باستادى. جەكسەنبى كۇنى امەريكالىق اسكەري كەمە وڭتۇستىك قىتاي تەڭىزىندەگى قىتاي باقىلاۋىنداعى ەكى شاعىن ارالعا تاعى ءبىر رەت جاقىن جاقىنداپ، اسكەري وپەراتسيا جاسادى. بۇل رەسمي بەيجىڭنىڭ نارازىلىعىن قوزعادى.

قۇراما شتاتتاعى WSJ باسىلىمى مەن  CNN ارناسىنىڭ حابارىنا قاراعاندا، اقش تەڭىز كۇشتەرىنە قاراستى «USS Decatur» اتتى زىمىرانمەن شابۋىلىنا  قابىلەتتى سوعىس كەمەسى وڭتۇستىك قىتاي تەڭىزىندە اسكەري وپەراتسيا جاساعان.  CNN ارناسىنا سۇحبات بەرگەن اقش تەڭىز كۇشتەرى اسكەري شەندىلەرىنىڭ ءبىرى: «قۇراما شتات ءار كۇنى وڭتۇستىك قىتاي تەڭىزىن قامتىعان ءۇندى-تىنىق مۇحيت ايماعىندا اسكەري وپەراتسيالار جۇرگىزىپ كەلەدى. بۇنىڭ ءبارى حالىقارالىق قۇقىقتارعا سايكەس كەلەدى»، – دەگەن.

اقش تەڭىز كۇشتەرى ءوز ارەكەتتەرىن «ەگەمەندىك اۋماعىن شامادان تىس كەڭەيتۋگە» قارسى تۇرۋ جانە حالىقارالىق قۇقىقپەن رۇقسات ەتىلگەن شەكتەردە ماڭىزدى سۋ جولدارىنىڭ ەركىن ناۆيگاتسيا قۇقىعىن قورعاۋ ارەكەتى دەپ تۇسىندىرەدى.

اقش پەن قىتاي اراسىندا وڭتۇستىك قىتاي تەڭىزىندەگى كەيبىر اۋماقتاردىڭ ەگەمەندىك قۇقىعى تۋرالى ۇقساماعان كوزقاراس بار. قۇراما شتات قىتايدى وڭتۇستىك قىتاي تەڭىزىنىڭ حالىقارالىق ەركىن سۋ جولى رەتىندە پايدالانۋعا كەدەرگى كەلتىرىپ وتىر دەپ ايىپتايدى.

ەكى ەل تەڭىزدەگى اسكەري ارەكەتتەرى ارقىلى ءبىر ءبىرىنىڭ ءۇندى-تىنىق مۇحيتىنداعى ىقپالىن السىرەتۋگە تىرىسىپ كەلەدى. بۇل قىتاي مەن اقش-تىڭ عاسىرلىق ۇلكەن قايشىلىعىنا ۇلاسۋى دا بەك مۇمكىن.

“The Qazaq Times”