تەرەزا مەي ۇكىمەتى كەزەكتەن تىس سايلاۋعا دايىندالۋدا

ۇلىبريتانيا پرەمەر-ءمينيسترى تەرەزا مەيدىڭ كومانداسى قاراشا ايىندا كەزەكتەن تىس سايلاۋ وتكىزۋگە دايىندالۋدا. بۇل تۋرالى lemonde.fr باسىلىمى مەيدىڭ سوزىنە سىلتەمە جاساپ حابارلايدى.

كەزەكتەن تىس سايلاۋ ۇلىبريتانيانىڭ ەۋرووداقتان شىعۋىنا قاتىستى كەلىسسوزدەر ساتسىزدىككە ۇشىراعان جاعدايدا وتكىزىلۋى مۇمكىن. سەبەبى، بريۋسسەلدىڭ بريتانيالىق ۇكىمەت ۇسىنعان جوسپاردى قابىلداۋدان باس تارتىپ وتىرعانى بارىمىزگە ءمالىم.

مەي ەو-نىڭ 19-20 قىركۇيەكتە زالبۋرگتە وتكەن كەزەكتى سامميتىنەن ورالعان بويدا مالىمدەمە جاساعان ەدى. لوندون مەن بريۋسسەل اراسىنداعى كەلىسسوزدەردىڭ تىعىرىققا تىرەلگەنىن ايتقان پرەمەر-ءمينيستردىڭ مالىمدەمەسىنەن، تەك ەو-مەن اراداعى كەلىسىمدە عانا ەمەس، جەكە ءوزىنىڭ دە تىعىرىققا تىرەلگەنىن اڭعارۋعا بولاتىنداي. سەبەبى، بريتانيا حالقىنىڭ تالابىنا قاراماستان، 2019 جىلى ءوز ەركىمەن وتستاۆكاعا كەتپەيتىنىن ءسوز اراسىنا قوسۋى، ونىڭ چەكەرس ۇسىنىسىندا دا، باسقاسىندا دا وزىنە سەنىمسىزدەۋ ەكەنىن بايقاتادى دەيدى ساراپشىلار. جالپى، ۇكىمەت باسشىسى تەرەزا مەي قاي جاعىنان العاندا دا قىسىمعا ۇشىراپ تۇرعانداي.  ماسەلەن، زالتسبۋرگ سامميتىنەن كەيىن ۇلىبريتانيا مينيسترلەر كابينەتىنىڭ مۇشەلەرى مەيدەن ەۋرووداقپەن قارىم-قاتىناستى رەتتەۋ ءۇشىن چەكەرس ۇسىنىسىنىڭ بالاماسى رەتىندە جاڭا جوسپار دايىنداۋدى تالاپ ەتكەن ەدى.  The Daily Telegraph باسىلىمىنىڭ مالىمەتىنشە، مينيسترلەر كابينەتى «ب جوسپارى» ەركىن ساۋدا ايماعىن ساقتاۋ ءۇشىن بريتانيانىڭ ەو ەرەجەلەرىن ورىنداۋعا مىندەتتەيدى. وسىعان بايلانىستى، بۇگىن، 24 قىركۇيەكتە بريتانيا مينيسترلەر كابينەتىنىڭ كەزەكتەن تىس وتىرىسى ءوتۋى مۇمكىن دەپ كۇتىلۋدە.  ەگەر، مەي وسى تالاپتى ورىنداماي، چەكەرس ۇسىنىسىنان باس تارتپاسا، برەكسيتتىڭ جۇزەگە اسىرىلۋىنا قارسى مينيسترلەر كابينەتىنىڭ اشىق نارازىلىعىنا ۇشىراۋى مۇمكىن دەپ كۇتىلۋدە.

بارىمىزگە بەلگىلى، لوندون مەن بريۋسسەل اراسىنداعى ۇلىبريتانيانىڭ ەۋرووداق قۇرامىنان شىعۋى تۋرالى رەسمي كەلىسسوزدەر 2017 جىلدىڭ ماۋسىم ايىندا باستالعان ەدى. سودان بەرى بريتانيا حالقىنىڭ نارازىلىعىن تۋىنداتقان بۇل شەشىم ءالى كۇنگە دەيىن تارتىستى بولىپ كەلەدى.

“The Qazaq Times”