قازاقستان مەن وزبەكستان اسكەرلەرىن اقش-قا وقۋ-جاتتىعۋ جۇمىستارىنا جىبەرمەك.

اقش ورتالىق باسقارۋ كوميتەتىنىڭ مالىمەتىنشە، قازاقستان، وزبەكستان، تاجىكستان، موڭعوليا جانە اۋعانستان ءوز اسكەرلەرىن ماسساچۋسەتس شتاتىندا وتەتىن «ايماقتىق بىرلەستىك – 2018»  اسكەري وقۋ-جاتتىعۋ جۇمىستارىنا قاتىستىرماق. وقۋ-جاتتىعۋ جۇمىستارى قىركۇيەك ايىنىڭ 21-ءى كۇنى وتەدى جانە وعان ءار ءتۇرلى مەملەكەتتەردەن كەلگەن 200-دەن استام سارباز قاتىسادى دەپ كۇتىلۋدە.

ەستەرىڭىزگە سالايىق، 11 قىركۇيەك كۇنى رەسەي قيىر شىعىستا ءوز تاريحىنداعى ەڭ اۋقىمدى اسكەري وقۋ-جاتتىعۋ جۇمىستارىن باستاعان. «شىعىس-2018» وقۋ-جاتتىعۋ جۇمىستارىنا 300 مىڭ سارباز، 1000-عا جۋىق ۇشاق، 36 مىڭ تانك، 80 اسكەري كەمە قاتىسۋدا. باستاپقىدا رەسەي قورعانىس مينيسترلىگى «شىعىس-2018» اسكەري جاتتىعۋلارىن حالىقارالىق دەپ اتاعان. بىراق وعان رەسەيدەن وزگە قاي مەملەكەتتەردىڭ اسكەرلەرى قاتىسىپ جاتقاندىعى ازىرگە بەلگىسىز.

ايتا كەتەتىن ءبىر جايت، ناتو رەسەيدىڭ «شىعىس-2018» اسكەري وقۋ-جاتتىعۋ جۇمىستارىنا «ماسكەۋ ۇلكەن سوعىسقا دايىندالىپ جاتىر» دەگەن باعا بەردى. ءدال وسىنداي وقۋ-جاتتىعۋ جۇمىستارى كەڭەستەر وداعىنىڭ تۇسىندا 1980 جىلى ۆارشاۆا كەلىسىمى ەلدەرىنىڭ قاتىسۋىمەن وتكەن. ول كەزدە باتىس ەلدەرى كرەملدىڭ بۇل ارەكەتىن «ءوزىنىڭ كۇش-قۋاتىن الەمگە پاش ەتۋ جانە ءىرى اسكەري وپەراتسياعا دايىندىق» دەپ باعالاعان.

"The Qazaq Times"