اقش پرەزيدەنتى دونالد ترامپقا ارنالعان «قورقىنىش» اتتى جاڭا كىتاپ جارىق كوردى.

قىركۇيەك ايىنىڭ 11-ءى كۇنى جۋرناليست، بوب ۆۋدۆوردتىڭ اق ءۇي باسشىسى دونالد ترامپقا ارنالعان «قورقىنىش» كىتابىنىڭ تۇساۋ كەسەرى وتەدى دەپ كۇتىلۋدە. كىتاپتىڭ «قورقىنىش» دەپ اتالۋىنا ترامپتىڭ ۆۋدۆوردپەن بولعان سۇحباتىندا ايتقان «شىنايى بيلىك بۇل - قورقىنىش» دەگەن ءسوزى سەبەپ بولعان. ۆۋدۆورد كىتابىندا اق ءۇي اكىمشىلىگىن «جىندىحاناعا» تەڭەپ، تارمپتىڭ ءوزىن «الەمدىك ساياساتتان حابارى جوق بەسىنشى سىنىپتىڭ وقۋشىسى» دەپ اتاعان. تۇساۋ كەسەرگە ءبىر اپتا قالعاندا اقش-تىڭ بەدەلدى باسىلىمدارىنا تاراتىلعان كىتاپتى جۋرناليستەر التى بولىككە ءبولىپ، كىتاپتان قىسقاشا ۇزىندىلەر كەلتىرۋدە.

ولاردىڭ بارلىعىن ولتىرەيىك

ۆۋدۆوردتىڭ سوزىنشە، ءسۇريا بيلىگى 2017 جىلدىڭ ءساۋىر ايىندا بەيبىت تۇرعىندارعا قارسى حيميالىق قارۋ قولدانعاننان كەيىن دونالد ترامپ قورعانىس ءمينيسترى دجەيمس مەتتيسكە باشار اساد باستاعان ءسۇريا بيلىك وكىلدەرىن ولتىرۋگە ۇسىنىس جاساعان. بىراق مەتتيس ترامپتىڭ بۇل ۇسىنىسىنان باس تارتقان.

سولتۇستىك كورەياعا سوققى جاسايىق

كىتاپ اۆتورىنىڭ ايتۋىنشا، ترامپ اق ءۇي اكىمشىلىگىن سولتۇستىك كورەياعا سوققى جاسايىق دەپ قورقىتقان. ول 2018 جىلدىڭ قاڭتار ايىندا قورعانىس سالاسىنا بولىنەتىن قارجىنى قىسقارتۋعا بايلانىستى وتكەن جابىق وتىرىستا قورعانىس ءمينيسترى دجەيمس مەتتيسكە: «اقش اسكەرى وڭتۇستىك كورەيادا نە ىستەپ ءجۇر؟ زىمىرانعا قارسى اۋە قورعانىسى جۇيەمىز ول جاقتا نە ىستەپ تۇر؟» دەگەن سۇراقتار قوعان. ءوز كەزەگىندە مەتتيس ترامپقا: «وڭتۇستىك كورەياداعى اۋە قورعانىس جۇيەسى ءۇشىنشى دۇنيەجۇزىلىك سوعىستىڭ الدىن الۋ ءۇشىن تۇر» دەپ جاۋاپ بەرگەن.

اۋعانستاندا بۇداندا جاقسى جۇمىس ىستەۋگە بولار ەدى

اۋعانستان ماسەلەسىنە كەلگەندە ۆۋدۆورد ترامپتىڭ اۋعانستانداعى اقش ارمياسى وكىلدەرىنە ايتقان ءسوزىن مىسالعا كەلتىرەدى. ۆۋدۆوردتىڭ سوزىنشە، ترامپ ءبىر كەزدەسۋدە: «اۋعانستاندا بۇداندا جاقسى جۇمىس ىستەۋگە بولار ەدى. ەندى قانشا ءولىم بولادى؟ قانشا ادام اياق، قولىنان ايىرىلادى؟ بۇل قاشان اياقتالادى؟» - دەپ اۋعانستانداعى اقش اسكەرىنىڭ باسشىلارىن سۇراقتىڭ استىنان العان.

ىزا مەن ەسسىزدىك

ۆۋدۆوردتىڭ جازۋىنشا، ترامپ پرەزيدەنت سايلاۋىنا رەسەيدىڭ ارالاسۋىنا قاتىستى ءجۇرىپ جاتقان تەرگەۋ جۇمىستارىنا قاتتى الاڭداۋشىلىق تانىتۋدا. ول ءتىپتى ءوزىنىڭ جەكە زاڭگەرى دجون دوۋنمەن اتالمىش ىسكە قاتىستى سۇراق-جاۋاپ تەستىندە وتكىزگەن. بىراق تەستتەن وتپەي قالعان. تەستتەن كەيىن دوۋن ترامپقا «ەگەر پروكۋرور ميۋللەرمەن كەزدەسىپ، تەرگەۋگە الىناتىن بولساڭ تۇرمەدەن بىراق شىعاسىڭ» دەپ ەسكەرتۋ جاساعان.

اق ءۇي ەمەس «جىندىحانا»

جوعارىدا اتالعان وقيعالاردان بولەك «قورقىنىش» كىتابىندا ترامپتىڭ اق ءۇي قىزمەتكەرلەرىنە قالاي قارايتىندىعى جونىندە دە ايتىلعان. كىتاپ اۆتورىنىڭ ايتۋىنشا، ترامپ ساۋدا ءمينيسترى ۋيلبۋر روسسقا: «مەن سىزگە سەنبەيمىن. بۇدان بىلاي ءسىزدىڭ قانداي دا ءبىر كەلىسسوزدەر جۇرگىزگەنىڭىزدى قالامايمىن. ءسىزدىڭ باستى رولدە ويناعان ۋاقىتىڭىز اياقتالدى» - دەگەن. ال اق ءۇي اكىمشىلىگىنىڭ باسشىسى راينس پريبۋستى كورىنگەن جەردە جۇرەتىن «ەگەۋقۇيرىق» دەپ اتاعان.

Twitter-ءدىڭ اقش ساياساتىنا اسەرى

ۆۋدۆورد ءوز كىتابىندا ترامپتىڭ «Twitter» پاراقشاسىنا ەرەكشە توقتالعان. ونىڭ ايتۋىنشا، ترامپ ءوزىنىڭ «Twitter» پاراقشاسىنا كۇندەلىكتى ارنايى ساراپتاما جۇرگىزەدى. ونىڭ كومەكشىلەرى اقش حالقى ترامپتىڭ قانداي جازباسىن كوپ تالقىلاعانىن، حالىق اراسىندا قانداي ماسەلە وزەكتى ەكەندىگىن زەرتتەيدى.

"The Qazaq Times"