اقش قورعانىس ءمينيسترى ءۇندىستان ساپارىن باستادى. فوتو; VOA .

اقش قورعانىس ءمينيسترى جەيمس مەتتيس كەشە ءۇندىستان ساپارىنا اتتاندى. ول مەملەكەتتىك حاتشى پومپەومەن بىرگە ءۇندىستاننىڭ قورعانىس جانە سىرتقى ىستەر مينيسترىمەن «2+2 كەلىسسوزىن» وتكىزۋگە دايىندالۋدا. بۇل تۋرالى VOA جاڭالىقتار قىزمەتى حابارلادى.

ەكى ەلدىڭ سىرتقى ىستەر جانە قورعانىس ۆەدومستۆولارى بەيسەنبى كۇنگى كەلىسسوز بارىسىندا جاڭا قاۋىپسىزدىك جانە ىنتىماقتاستىق كەلىسىمىنە قول قويادى دەپ كۇتىلۋدە. كەلىسىم جۇزەگە اسسا، ەكى ەلدىڭ قارۋلى كۇشتەرى شيفرلانعان اسكەري بارلاۋ مەن حابار-بايلانىس سالاسىندا ورتاقتاسپاق. سونداي-اق، ءۇندىستاننىڭ اقش-تان وزىق قارۋ-جاراقتاردى ساتىپ الۋىنا جول اشادى دەپ كۇتىلۋدە.

شىن مانىسىندە، اقش پەن ءۇندىستان قىتايدىڭ ءۇندى-تىنىق مۇحيتىنداعى اسكەري ىقپالىنىڭ ارتۋىنان بىردەي الاڭداۋلى. قۇراما شتات بيىل جىل باسىندا اقش تىنىق مۇحيت اسكەري قولباسشىلىعىنىڭ اتىن ءۇندى-تىنىق مۇحيت اسكەري قولباسشىلىعى ەتىپ وزگەرتتى.  ارى، ءۇندىستاننىڭ ايماقتاعى قاۋىپسىزدىك پەن تەپە-تەڭدىكتى ساقتاپ تۇرۋداعى ءرولىن نىعايتۋ ءۇشىن، قۇراما شتات ۇندىستانمەن اسكەري ىنتىماقتاستىقتى تەرەڭدەتە ءتۇستى. وعان اقش-تىڭ ۇندىستانعا ساتىپ بەرگەن وزىق اسكەري تەحنيكالارىنىڭ كوبەيۋى جانە ەكى ەلدىڭ بىرلەسكەن اسكەري وقۋ-جاتتىعۋلارىنىڭ جيىلەۋى انىق دالەل بولا الادى.

دەگەنمەن، ەكى ەل ورتاسىندا كەلىسە الماعان ماسەلەلەر دە بار. ايتالىق، ءۇندىستاننىڭ يران مۇنايىن يمپورتتاۋىنا جانە رەسەيدەن S-400 زىمىران قورعانىس جۇيەلەرىن ساتىپ الۋ ىستەرىنە قۇراما شتات جاعى نارازى. كەزەكتى «2+2 كەلىسسوزى» بۇل قالىپتاسقان كەرەعارلىقتى شەشىپ، اقش-ءۇندىستان قاۋىپسىزدىك كەلىسىمىن جۇزەگە اسىرا الاتىن، المايتىنى ءالى بولجاۋسىز.

قازىرگى مالىمەتتەرگە قاراعاندا، اقش ۇندىستانعا يران مۇنايىن يمپورتتاۋ ماسەلەسىندە بەلگىلى دارەجەدە جەڭىلدىكتەر جاساسا كەرەك. بىراق، رەسەيلىك اۋە قورعانىس تەحنيكاسىن ساتىپ الۋ ىسىندە اقش تارابى كوبىرەك قارسىلىق تانىتقان. بۇدان سىرت، اقش پەن كەيبىر ماڭىزدى ساۋدا سەرىكتەرى اراسىندا تۋىلىپ جاتقان ساۋدا داۋلارى ۇندىستانعا دا جەتىپ وتىر.

اقش مەملەكەتتىك دەپارتامەنتىنىڭ وڭتۇستىك ازيا ىستەرى جونىندەگى جاۋاپتى وكىلىنىڭ ايتۋىنشا، اقش پەن ءۇندىستان ارىپتەستىكتى جاڭا دەڭگەيگە كوتەرۋگە تىرىسۋدا. ايتالىق، ەكى ەلدىڭ قاۋىپسىزدىك ىنتىماقتاستىعى تەك اسكەري تەحنيكالاردى ساتۋ مەن ساتىپ الۋعا شەكتەلمەي، وڭىرلىك قيىنشىلىقتاردى ورتاق شەشۋگە دەيىن جەتكىزبەك.

“The Qazaq Times”