اقش پەن جاپونيا قىتاي ىرگەسىندە تەڭىز اسكەري جاتتىعۋىن وتكىزدى

وتكەن اپتانىڭ سوڭىندا، اقش-تىڭ تىنىق مۇحيت فلوتىنىڭ قولباسشىلىعى مالىمدەمە جاساپ، 31 تامىز كۇنى جاپونيانىڭ تەڭىز كۇشتەرىمەن بىرلەسە وتىرىپ، وڭتۇستىك قىتاي تەڭىزىندەگى داۋلى سۋ الاپتارىندا وقۋ-جاتتىعۋ وتكىزگەنىن جەتكىزدى.

مالىمەتكە قاراعاندا، وقۋ-جاتتىعۋعا اقش-تىڭ ءۇندى-تىنىق مۇحيت ايماعىنداعى 7-ءشى فلوتىنا قاراستى «رەيگان» ۇشاق تاسىمالداۋشى كەمەسى جانە زىمىرانعا قارسى ەكى سوعىس كەمەسى مەن جاپونيانىڭ سۋ ءۇستى سوعىسىنا ارنالعان ەڭ ۇلكەن كەمەسى «كاگا» جانە ەكى شابۋىلشى كەمە، تىكۇشاقتارى قاتىسقان. اتالعان تەڭىز كۇشتەرى سۋ ءۇستى شابۋىلى، بىرلەسە تويتارىس بەرۋ، سۋ ۇستىندە زات جەتكىزۋ جانە اسكەري بايلانىس وفيتسەرلەرىمەن الماسۋ جاتتىعۋلارىن وتكىزگەن.

اقش اسكەري شەندىلەرىنىڭ ايتۋىنشا، بۇل رەتكى جاتتىعۋ وداقتاس ەكى ەلدىڭ كوپ جىلعى اسكەري ىنتىماقتاستىعىن ءتىپتى دە تەرەڭدەتكەن جانە سۋ ءۇستى سوعىسىنداعى ەكى اسكەري كۇشتىڭ ءوزارا تۇسىنىستىگىن ارتتىرعان.

حابارلارعا قاراعاندا، كوپ ۇزاماي اقش اۋە كۇشتەرى اۋىر سالماقتى B-52 بومبالاۋشى ۇشاعىن ۆەتنام-قىتاي اراسىنداعى داۋلى سۋ الابىنا جىبەرەدى.

وسىعان دەيىن وڭتۇستىك قىتاي تەڭىزىنە قاتىستى ايتىلىمداردا، سوڭعى جىلدارى قىتاي اتالعان تەڭىزدە اسكەري كۇش-جىگەرىن ۇزدىكسىز نىعايتىپ، قارۋ-جاراققا قارسى كرۋيزدىك زىمىرانداردى، جەر ءۇستى-اۋە زىمىراندارىن جانە ينتەرفەرەنتسيا تەحنولوگيالارىن قامتيتىن جوعارى دارەجەلى جاۋىنگەرلىك جۇيەلەردى ورنالاستىرىپ كەلە جاتقانى ايتىلعان. اقش پرەزيدەنتى جاقىندا قىتايدىڭ تىنىق مۇحيتىنداعى ارتىپ كەلە جاتقان ىقپالىنا قارسى شارالار قولداناتىنىن مالىمدەگەن ەدى.

“The Qazaq Times”