فوتو: ساۋديالىق ايەلدەر

بيىلعى جىلى ساۋد-ارابياسى ايەلدەر قۇقىعىنا قاتىستى ءبىر ەمەس، قاتارىنان بىرنەشە سەنساتسيالىق شەشىمدەرگە بارىپ وتىر. بۇدان بۇرىن دا، ساۋديا تاريحىندا العاش رەت ايەلدەردىڭ كولىك جۇرگىزۋىنە رۇقسات ەتكەن بيلىك، بۇل جولى ارابتارعا تاڭسىق تاعى ءبىر شەشىم قابىلدادى. ياعني، ساۋد-ارابياسىنىڭ ازاماتتىق اۆياتسياسىنىڭ باس باسقارماسى (GACA) بەس ايەلگە ۇشقىش ليتسەنزياسىن بەرگەن. بۇل تۋرالى «lemonde.fr» حابارلايدى.

وسىلايشا، ساۋديالىق ايەلدەرگە Saudi Arabian Airlines (Saudia) اۆياكومپانياسىنىڭ ۇشاقتارىندا ەكيپاج كومانديرلەرى رەتىندە جۇمىس ىستەۋگە رۇقسات ەتىلگەن. ساۋد-ارابياسى ايەلدەرىنە ۇشقىن ليتسەنزياسىن بەرۋ «GACA»-نىڭ باستى جوسپارلارىنىڭ ءبىر بولىگى بولىپ تابىلادى. وسىعان سايكەس، ساۋديالىق ايەلدەر اۆياتسيا سەكتورىندا جۇمىس ىستەۋگە مۇمكىندىك الادى. ال، بۇل — حالىقارالىق ازاماتتىق اۆياتسيا ۇيىمىنىڭ (ICAO) باستى ماقساتتارىنىڭ ءبىرى بولىپ تابىلادى ەكەن.

جوعارىدا دا ايتىپ وتكەنىمىزدەي، سوڭعى ۋاقىتتا «GACA» مەن تەحنيكالىق قىزمەت كورسەتەتىن كومپانيالاردا جۇمىس ىسەيتىن ساۋد-ارابياسىنىڭ ايەلدەرى كوبەيۋدە. ەسكە سالايىق، وسى جىلدىڭ 9 شىلدەسىندە، ساۋد-ارابياسىنىڭ ادىلەت مينيسترلىگى تاريحتا ءبىرىنشى رەت ايەلدەرگە نوتاريالدىق قىزمەت كورسەتۋ قۇقىعىن تانىتاتىن ليتسەنزيا بەرگەن ەدى. الايدا، ارابيالىق اقپارات كوزدەرىنىڭ حابارلارىنا سەنسەك، ءار-ريادتىڭ وسىنداي قوعامدىق شەشىمدەرىنە قاراماستان، ەلدەگى ايەلدەردىڭ ەركىندىگى ءالى دە ەرلەردىڭ باقىلاۋىندا كورىنەدى.

“The Qazaq Times”