فوتو: "زۆەزدا" تەلەارناسى.

رەسەي 300 مىڭ ساربازدىڭ قاتىسۋىمەن سوڭعى 30 جىلدا بولماعان اسكەري وق-جاتتىعۋ جۇمىستارىن وتكىزبەك.

ينتەرفاكس اقپارات اگەنتتىگىنىڭ مالىمەتىنشە، رەسەي قارۋلى كۇشتەرى قىركۇيەك ايىنىڭ 11-ءى مەن 15-ءى كۇندەرى ارالىعىندا 300 مىڭ ساربازدىڭ قاتىسۋىمەن «شىعىس-2018» اسكەري وقۋ-جاتتىعۋ جۇمىستارىن وتكىزبەك.

28 تامىز كۇنى اتالمىش وقۋ-جاتتىعۋ جۇمىستارىنا قاتىستى مالىمدەمە جاساعان رەسەي قورعانىس ءمينيسترى سەرگەي شويگۋ: «بۇل جولعى اسكەري وقۋ-جاتتىعۋ جۇمىستارى 1981 جىلى وتكەن «باتىس-81» وقۋ-جاتتىعۋ جۇمىستارىنا ۇقساس. بىراق وداندا اۋقىمدىراق. «شىعىس-2018-گە» ءبىر مىڭعا جۋىق ۇشۋ اپپاراتتارى مەن 300 مىڭنان استام سارباز جانە تىنىق مۇحيتى مەن سولتۇستىك فلوت تا قاتىسادى. وقۋ-جاتتىعۋ جۇمىستارى شىعىس جانە ورتالىق اسكەري وكرۋگتەرىنىڭ بارلىق سىناق الاڭدارىندا وتەدى» - دەپ مالىمدەدى.

ناتو ەلدەرى رەسەي قارۋلى كۇشتەرىنىڭ بۇل جولعى اۋقىمدى اسكەر وقۋ-جاتتىعۋ جۇمىستارىنا «ماسكەۋ ۇلكەن سوعىسقا دايىندالۋدا» دەگەن باعا بەردى.

بۇعان دەيىنگى كەڭەستەر وداعى تۇسىندا ۆارشاۆا كەلىسىمى ەلدەرىمەن بىرلەسىپ وتكەن «باتىس-81» اسكەري وقۋ-جاتتىعۋ جۇمىستارى پولشا شەكاراسى ماڭىندا وتكەن. ول كەزدە رەسمي ماسكەۋدىڭ بۇل ارەكەتىن باتىس ەلدەرى «سسسر ءوز كۇش-قۋاتىن الەمگە پاش ەتۋدە جانە اۋقىمدى شابۋىل جاساۋ وپەراتسياسىنا دايىندالۋدا» دەپ باعالاعان.

“The Qazaq Times”