تاجىكستان پرەزيدەنتى ەمومالي راحمون رەسمي ىسساپارمەن وزبەكستانعا باردى.

وسىدان بىرنەشە جىل بۇرىن تاجىك باسشىسىنىڭ تاشكەنتكە ساپارى جونىندە ايتۋدىڭ ءوزى كۇلكىلى بولاتىن. سەبەبى يسلام كارىموۆتىڭ تۇسىندا وزبەكستان مەن تاجىكستان قارىم-قاتىناسى وتە ناشار دەڭگەيدە ەدى. ەكى ەل اراسىنداعى تاۋار اينالىمى تومەن، ال مينا الاڭىنا اينالعان مەملەكەتتىك شەكارا سوعىس كەزىن ەسكە تۇسىرەتىن. بىراق سوڭعى ءبىر جارىم جىلدا تاشكەنت پەن دۋشانبە قارىم-قاتىناسى جاڭا دەڭگەيگە كوتەرىلدى. بۇعان دەيىن تاجىكستانعا رەسمي ىسساپارمەن شاۆكات ميرزيەەۆ بارىپ، ەكى ەل اراسىنداعى ساۋدا-ەكونوميكالىق بايلانىس، شەكارا، كەدەن قىزمەتى سياقتى وزەكتى ماسەلەلەردى تالقىلاپ قايتقان.

وزبەكستان پرەزيدەنت اكىمشىلىگىنىڭ مالىمەتىنشە، ەمومالي راحمون مەن شاۆكات ميرزيەەۆ كەزدەسۋ بارىسىندا ەكى ەل اراسىنداعى ساۋدا-ەكونوميكالىق، مادەني-گۋمانيتارلىق جانە كوممۋنيكاتسيالىق بايلانىس جونىندە كەلىسسوزدەر جۇرگىزەدى. شەتەلدىك ساراپشىلاردىڭ پىكىرىنشە، راحمون مەن ميرزيەەۆ بۇل جولعى كەزدەسۋلەرىندە وزبەكستان مەن تاجىكستان اراسىنداعى سۋ-ەنەرگەتيكالىق بايلانىس جانە قىتايدىڭ ورتالىق ازياداعى ەكونوميكالىق جوبالارى جونىندە سويلەسەدى. اتاپ ايتقاندا قازىرگى تاڭدا رەسمي تاشكەنتتى «روگۋن» گيدرو ەلەكتر ستانتسياسى قۇرىلىسىنىڭ اياقتالۋىنا بايلانىستى تاجىكستاننان كەلەتىن سۋ ماسەلەسى، ال دۋشانبەنى بولاشاقتا تاجىكستان ەكونوميكاسىنىڭ قىتايعا تاۋەلدى بولىپ قالۋى الاڭداتادى.

بۇدان بولەك قوس تاراپ اۋعانستان ماسەلەسىن تالقىلايدى دەپ كۇتىلۋدە. ەمومالي راحمون سوڭعى ۋاقىتتارى تاجىكستان شەكاراسى ماڭىنداعى اۋدانداردى ءوز باقىلاۋىنا العان تاليبان قوزعالىسىمەن وزبەكستان ارقىلى بايلانىس ورناتۋدى كوزدەۋدە. سەبەبى رەسمي تاشكەنت بيلىك باسىنا شاۆكات ميرزيەەۆتىڭ كەلۋىمەن اۋعانستان داعدارىسىنا كوبىرەك كوڭىل بولە باستاعان جانە تاليبان قوزعالىسىمەن بەيرەسمي بايلانىس ورناتقان.

"The Qazaq Times"