تالىپتەر گازنيگە باسىپ كىردى. فوتو: VOA.

اۋعانستانداعى تاليبان كۇشتەرى ورتالىق قالا كابۋلعا 150 شاقىرىم جەردەگى گازني قالاسىنا شابۋىل جاسادى. تالىبتەر مەن ۇكىمەتكە قاراستى قارۋلى كۇشتەر اراسىنداعى سۇراپىل قاقتىعىس بۇگىن تۇستەن بۇرىن بولعان. بۇل تۋرالى VOA اقپاراتتىق قىزمەتى حابارلادى.

جەرگىلىكتى بيلىكتىڭ وكىلدەرى مەن تۇرعىندارى دا قارۋلى قاقتىعىستاردىڭ قالا ىشىندە بولىپ جاتقانىن راستاپ، حابار تاراتقان.

تالىبتەردىڭ باق-قا بۇل تۋرالى بەرگەن مالىمەتىندە، تاليبان كۇشتەرى بەيسەنبى كۇنى تۇندە گازني پروۆينتسياسىنىڭ ورتالىعىندا وننان استام اسكەري وپەراتسيا جاساپ، كوپتەگەن قارۋ-جاراق پەن وق-دارىلەردى باسىپ العاندارىن حابارلاعان. قازىرگە دەيىن تالىبتەردىڭ بۇل مالىمەتىن راستايتىن نەمەسە جوققا شىعاراتىن دەربەس اقپارات كوزدەرى جوق.

اۋعانستاندىق باق بولسا، قاقتىعىسقا بايلانىستى كابۋل مەن گازني اراسىنداعى جولداردىڭ جابىلعانىن حابارلادى. سوڭعى بىرنەشە اي ىشىندە گازنيدەگى قاۋىپسىزدىك ماسەلەسىنىڭ قيىنداي تۇسكەنى تۋرالى اقپاراتتار تارالىپ جاتقان.

“The Qazaq Times”