پابلو پيكاسسونىڭ كورمەسى اشىلدى

قر ۇلتتىق مۋزەيىندە حح عاسىردىڭ ەڭ تانىمال جانە بەدەلدى شەبەرلەرىنىڭ ءبىرى – پابلو پيكاسسونىڭ بىرەگەي  كورمەسى اشىلدى، دەپ حابارلايدى قر مادەنيەت جانە سپورت مينيسترلىگى.

قازاقستان رەسپۋبليكاسى مادەنيەت جانە سپورت مينيسترلىگى ۇيىمداستىرعان «پابلو پيكاسسو. ۆوللوريستىك سەلەستينا مەن كەراميكا» ەكسپوزيتسياسى استانانىڭ 20-جىلدىعىنا وراي وتكىزىلدى.

كورمە بارىسىندا قالا قوناقتارى مەن تۇرعىندارى كوركەم  كەراميكا مەن پيكاسسو گراۆيۋرالارىنىڭ سيرەك كورسەتىلەتىن كوللەكتسياسىن تاماشالادى. قۇمىرالار، تاباقشالار، ساۋىتتار، ەرتەگىدەگى قۇستار مەن ميفتىك جاراتىلىستار – ۇلى شەبەر ەكىنشى دۇنيەجۇزىلىك سوعىستان كەيىن تۇراقتاعان فرانتسيانىڭ وڭتۇستىگىنىڭ عالامات شۋاقتى پەيزاجدارىنداي كوز تارتادى.

كورمەنىڭ اشىلۋىنا قاتىسقان يتاليانىڭ قازاقستانداعى ەلشىسى پاسكۋال د^,اۆينو دا وسىنداي شارانىڭ ۇيىمداستىرىلعانىنا  قۋانىشتى ەكەنىن مالىمدەدى.

پابلو پيكاسسو  تورت مىڭنان اسا دەكوراتيۆتى كەراميكالىق فورما جاساعان. پابلو پيكاسسو تانىس زاتتاردىڭ ۋتاليتارلىعىن بىرەگەيلىك، دارالىق پەن كوركەم تۋىندىنىڭ سيقىرلىعىمەن بىرىكتىرە الدى. ونىڭ ساۋىتتارى مەن كەسەلەرى ءوزىنىڭ ادەيىلەپ جاسالعان فورمالارىنىڭ ارقاسىندا ادەمى، تۇتاس جانە تىلسىم ءھام تارتىمدى ارحايكالىق ءمۇسىن ونەرىن ەسكە تۇسىرەدى.  وسى كوزتارتارلىق، ءمىنسىز پىشىندەرگە وي جۇگىرتىپ قاراساق، عاجايىپ قۇستار مەن اڭداردىڭ ءتىرىلىپ، ال ءتۇر-ءتۇسسىز كەراميكادان جاسالعان مۇسىندەرگە جان ءبىتىپ، ادام كەيىپىنە ەنەتىنىن ەلەستەتەمىز، ادەتتەگى قاراپايىم وبرازدار قايتالانباس تۇتاس تاريح رەتىندە كوز الدىمىزعا كەلەدى.

پيكاسسونىڭ بۇل جۇمىستارى – اۆتورلىق كەراميكانىڭ العاشقى تاجىريبەسى ەمەس. ۆوللوريستىك كەراميكانىڭ بەسىگى – «مادۋرا» كەراميكالىق شەبەرحاناسى ءالى كۇنگە دەيىن بار.

كورمە 2018 جىلعى 3 قاراشاعا دەيىن جالعاسادى.

  “The Qazaq Times”