تۇركيا قىتايمەن بىرلەسىپ اتوم ەلەكتر ستانتسياسىن سالماق – دەپ حابارلايدى ريا نوۆوستي اقپارات اگەنتتىگى.

تۇركيانىڭ ەنەرگەتيكا جانە تابيعي رەسۋرستار ءمينيسترى فاتيح دەنمەزدىڭ سوزىنشە، قازىرگى تاڭدا وزگە ايماقتارمەن سالىستىرعاندا ستامبۇل قالاسى مەن ءمارمار تەڭىزى اۋماعىنداعى اۋداندار ەلەكتر ەنەرگياسىن كوبىرەك پايدالانادى. وسىعان بايلانىستى تۇركيا بيلىگى قىتايمەن بىرلەسىپ ەلدىڭ ەۋروپالىق بولىگى بولىپ سانالاتىن فراكيا اۋماعىنا اتوم ەلەكتر ستانتسياسىن سالۋدى جوسپارلاۋدا. ازىرگە اەس قۇرىلىسى قاي ۋاقىتتا باستالاتىنى بەلگىسىز. بىراق قوس تاراپ بىرلەسىپ جۇمىس ىستەۋگە بايلانىستى كەلىسىمگە كەلگەن.

بۇعان دەيىن ءساۋىر ايىنىڭ 3-ءى كۇنى تۇركيا رەسەيدىڭ «روساتوم» كومپانياسىمەن بىرلەسىپ №1 «اككۋيۋ» اتوم ەلەكتر ستانتسياسىنىڭ قۇرىلىسىن باستاعان. «اككۋيۋ» اەس-ءى «build-own-operate» (قۇراستىر-باسقار-جۇزەگە اسىر) مودەلى بويىنشا سالىنۋدا. ياعني قۇرىلىس جۇمىستارى اياقتالعاننان كەيىن «اككۋيۋدىڭ» تولىقتاي يەسى "روساتوم" كومپانياسى بولادى جانە اەس جۇمىسىن ءبىر ءوزى جۇرگىزەدى.

بۇدان بولەك تۇركيا بيلىگى الداعى ۋاقىتتا جاپونيامەن بىرلەسىپ ءۇشىنشى اتوم ەلەكتر ستانتسياسىنىڭ قۇرىلىسىن باستاماق. الدىن الا بولجام بويىنشا، قۇرىلىس جۇمىستارى جاقىن ۋاقىتتا سينوپ پروۆينتسياسىندا باستالادى دەپ كۇتىلۋدە.

“The Qazaq Times”